Ertis-Baıan óńirinde qaban kóbeıe bastaǵan
PAVLODAR. KAZINFORM - Pavlodar oblysynyń aýmaǵynda qazirgi kúni 200-den astam qaban bar. Orman jáne janýarlar dúnıesin qorǵaý ınspektorlary turaqty túrde monıtorıng júrgizip keledi.
Sońǵy ýaqytta Ertis qaýmalynda jabaıy janýarlar kóbeıip keledi. Sonyń ishinde elik pen qabannyń sany arta túsken.
Bıyl jabaıy janýarlar Aqsý qalasy mańyndaǵy saıajaılarǵa jıi kirgen. Adamnan qaımyqpaıtyn qabannyń kóbeıýi turǵyndardy ǵana emes, ormanshylardy da alańdatyp otyr. Aıtýlarynsha, jabaıy janýarlar ádette ymyrt úıirile bastaǵanda ormannan shyǵady. Ásirese Aqsý men Pavlodar qalalarynyń mańaıynda jıi kezdesedi.
- Qabandardyń saıajaı aýmaǵyna kirgeni týraly turǵyndar birneshe márte shaǵymdandy. Olardyń tirshilik etýine qolaıly orta - ózenniń jaǵasy, ný orman, qalyń qamys. Ertis qaýmalynyń Aqsý qalasy mańynda jabaıy shoshqalardyń sany 40-tan asady. Túngi ýaqytta qorek izdep, saıajaılarǵa keledi. Bul jerde birneshe saıajaı alaby bar. Al qabandardyń oblystaǵy jalpy sany 200-den asady, - deıdi óńirlik orman jáne janýarlar dúnıesin qorǵaý mekemesiniń basshysy Ajdar Júsipov.
Qaban jyrtqysh ańdar qataryna jatady. Ormanshylar soǵan oraı turǵyndarǵa saq bolýdy eskertip otyr. Jabaıy janýar júrgen jeriniń bárin qoparyp, shóptiń tamyrlarymen qorektenedi. Ertis qaýmalynda ańshylyqtyń barlyq túrine tyıym salynǵan. Jabaıy ańnyń sanyn retteýge múmkindik joq.
Buǵan deıin Ertis ormanynda fototuzaqqa bir mezgilde birneshe ań túsip qalǵany týraly jazǵanbyz.