Ertis-Baıan óńirinde búginnen bastap balyq aýlaýǵa tyıym salyndy
PAVLODAR. KAZINFORM — Mamyr aıynyń sońyna deıin oblys aýmaǵynda «Ýyldyryq shashý» aktsııasy ótkiziledi. Tártip saqshylary balyqtyń kez kelgen túri men asshaıan artemııasyn aýlaýǵa bolmaıtynyn eskertip otyr.
Balyqtyń ýyldyryq shashý kezeńine qolaıly jaǵdaı týdyrý, sý janýarlaryn zańsyz aýlaý, bıologııalyq resýrstar ónimderimen zańsyz aınalym kezeńinde brakonerliktiń aldyn alý jáne jolyn kesý maqsatynda Pavlodar oblysynda «Ýyldyryq» shashý aktsııasy jarııalandy. Balyq aýlaýǵa tyıym 15 sáýir men 30 mamyr aralyǵynda saqtalady.
— Pavlodar oblysynyń dalaly jerlerindegi jáne tuşy sý aıdyndarynda, sonyń ishinde Ertis ózeninde (Abaı oblysynyń shekarasynan Reseı Federatsııasymen memlekettik shekaraǵa deıingi jaıylmaly sý aıdyndarynda) balyqtyń kez kelgen túrin aýlaýǵa tyıym salyndy. Sondaı-aq, Qanysh Sátbaev atyndaǵy kanaldyń barlyq uzyndyǵy atalǵan tyıym saqtalady. Áýesqoılyq, sporttyq balyq aýlaýdy qospaǵanda, barlyq sý toraptarynda, sý qoımalarynda bekitilgen balyq sharýashylyǵy ýchaskelerinde qaraquıryq, alabuǵa, sazan jáne shortandy aýlaýǵa, sondaı-aq tuzdy sý aıdyndarynda asshaıan artemııasyn jınaýǵa jáne daıyndaýǵa tyıym salynady, — dep habarlady óńirlik polıtsııa departamentinen.
Polıtseıler tabıǵatty qorǵaý zańnamasyn buzǵany úshin ákimshilik jáne qylmystyq jaýapkershilik baryn eskertedi.
Buǵan deıin Ertis ózeninde balyqtardyń ýyldyryq shashý kezeńi qalaı júretini týraly jazǵanbyz.