Ertis-Baıan óńirinde boran saldarynan 300-ge jýyq mal qyrylyp qalǵan
PAVLODAR. KAZINFORM – Osy aptada soqqan aq tútek boran oblystyń kóptegen eldi mekenine aıtarlyqtaı materıaldyq shyǵyn ákelgen. Eki qala men eki aýdan tabıǵı sıpattaǵy tótenshe jaǵdaı rejımin jarııalady.
Oblystyq tótenshe jaǵdaılar jónindegi komıssııa otyrysynda qolaısyz aýa raıynyń saldaryn joıý sharalary qaraldy.
Óńir ákimdiginen atap ótkendeı, 9-12 naýryz aralyǵynda Pavlodar oblysy aýmaǵynda jyldamdyǵy sekýndyna 30 metrge deıin jetken soltústik-batys tsıklony tirkelgen. Bul oblys aýmaǵynda túsken qardyń 80%-ǵa ulǵaıýyna ákep soqtyrǵan.
Qazgıdromettiń deregine sáıkes, keıbir jerlerde qardyń qalyńdyǵy 2-den 20 sm-ge deıin artqan. Aqtoǵaı men Sharbaqty aýdandarynda qardyń qalyńdyǵy 10-20 sm shamasynda tirkelip otyr.
Energetıka jáne turǵyn úı-kommýnaldyq sharýashylyq basqarmasynyń dereginshe, qolaısyz aýa raıy kezeńinde oblystyń 96 aýyldyq eldi mekeni elektr qýatynan apattyq jaǵdaıda ajyratylǵan. Qalpyna keltirý jumystaryna 43 avarııalyq brıgada jáne 100-den astam maman tartylyp, elektrmen jabdyqtaý 13 naýryz kúni saǵat 18:00-ge deıin tolyqtaı qalpyna keltirilgen.
– Tabıǵı apattyń saldarynan Ekibastuz qalasynda 75 kópqabatty turǵyn úıdiń, 9 áleýmettik nysannyń jáne bir ákimshilik ǵımarattyń shatyry zaqymdandy. Qazirgi ýaqytta ǵımarattarǵa tekserý júrgizilip, keltirilgen shyǵyn kólemi naqtylanýda. Qalada jergilikti aýqymdaǵy tabıǵı sıpattaǵy tótenshe jaǵdaı jarııalandy. Tabıǵı apattan zardap shekken jeke jáne zańdy tulǵalardan ótinishter qabyldaý jalǵasyp jatyr, - dep habarlady oblys ákimdigininen.
Aqsý qalasynda daýyl saldarynan 32 nysannyń, sonyń ishinde turǵyn úıler men ınfraqurylym nysandarynyń shatyrlary zaqymdandanǵan. Atalǵan qalada jáne Baıanaýyl, Pavlodar aýdandarynda tabıǵı sıpattaǵy tótenshe jaǵdaı rejımi engizildi.
– Baıanaýyl aýdany aýmaǵynda da ınfraqurylym nysandary men turǵyn úı qory zaqymdanǵan. 38 aýyldyq eldi mekenniń 37-sinde elektr qýatynyń óshýi tirkeldi. Sonymen qatar borannyń saldarynan 198 bas usaq mal, 2 bas iri qara jáne 82 jylqy qyrylǵan. Qazirgi ýaqytta boranda yǵyp ketken 600-den astam qoı izdestirilip jatyr, - dep habarlady ákimdikten.
Elektr jaryǵynan ajyraý derekteri Aqtoǵaı men Aqqýly aýdandarynda da tirkelgen.
Óńirlik tótenshe jaǵdaı departamentiniń aqparynsha, oblystaǵy 58 eldi meken sý tasqyny qaýpi bar aımaqtarǵa jatqyzyldy. Búgingi tańda aýyldyq jerlerden 196 myń tonnadan astam qar shyǵarylǵan.
Buǵan deıin Pavlodarda aq tútek borannyń saldarynan jol apattary jıilep, eldi mekender jaryqsyz qalǵany týraly jazǵanbyz.
Sondaı-aq boranda mal izdeýge shyqqan er adam úsikke urynyp, kóz jumdy.
Boran kezinde aýyl muǵalimi jolda turyp qalǵan kólikterge jol kórsetip, 4 shaqyrym jaıaý júrgeni týraly da materıal jaryq kórdi.