Ertis-Baıan óńirinde bıyl 67 myń kóshet egiledi
PAVLODAR. KAZINFORM — Pavlodar oblysynda kóktemgi tal egý jumystary qyzý jalǵasyp jatyr. Ásirese oblys ortalyǵynda jóke aǵashyn otyrǵyzýǵa mán berilip otyr.
Óńirde bıyl 67 myń aǵash kóshetin egý josparlanǵan. Jalpy 2023 jyldan beri oblys aýmaǵynda 60 myńǵa jýyq aǵash egilip, jasyl jelek qory aıtarlyqtaı jańara túsken. Ásirese, qala kóshelerindegi qýraǵan terekter kezeń-kezeńimen joıylyp, olardyń ornyna ekologııalyq ári sándik turǵydan tıimdi jóke aǵashtary egilip jatyr.
— Sońǵy úsh jyl ishinde qalanyń ortalyq kóshelerine 600-den asa jóke aǵashy egildi. Mamandardyń aıtýynsha, aǵashtyń bul túri qalalyq ortaǵa jaqsy beıimdeledi. Kútimi jeńil ári uzaq jyldar boıy kóleńke berip, aýany tazartady. Óńirdiń ekologııalyq tepe-teńdigin saqtaýǵa múmkindik beretin mundaı jobalar ary qaraı da jalǵasyn tappaq. Jýyrda ǵana qalalyq saıabaqqa 150 dana qaraǵaı kósheti otyrǵyzyldy, — dep habarlady óńir ákimdiginen.
Jóke aǵashy shań-tozańǵa, gazdy aýaǵa, ystyqqa da, sýyqqa da tózimdi. Tamyrlanǵannan keıin kúrdeli kútimdi qajet etpeıdi. Degenmen, alǵashqy jyldary turaqty sýarý, topyraqtyń kebýinen qorǵaý jáne durys otyrǵyzý sııaqty jaýapkershilikti qajet etetin sátteri bar.
Eske sala keteıik, bıyl Ertis ormanynda 14,5 mln qaraǵaı kósheti otyrǵyzylady.
