Ertis-Baıan óńirinde aýany lastaıtyn 703 myń tonna qaldyq shyǵarylǵan
PAVLODAR. KAZINFORM - Ertis-Baıan óńirinde byltyr aýany lastaıtyn 703 myń tonna qaldyq shyǵarylǵan. Bul 2022 jylmen salystyrǵanda 3,2 paıyz az. Qorshaǵan ortaǵa bólinetin qaldyqtyń 95 paıyzy 64 kásiporynǵa tıesili.
Bıyl 17 nysan ekolog mamandardyń nazaryna ilikken. Tórteýi tekserilip, ekeýi óndiriske alyndy. Profılaktıkalyq baqylaýdy júrgizý úshin alǵashqy jartyjyldyqta 8 nysanǵa ekologııa departamenti barady dep josparlanǵan. Oblys turǵyndarynyń quqyq qorǵaý jáne memlekettik organdarǵa júginýine baılanysty 7 jospardan tys qadaǵalaý uıymdastyryldy. Jalpy 17 ret tekseris jasalyp, 52 buzýshylyq anyqtalǵan.
- 2023 jyldyń qorytyndysy boıynsha qorshaǵan ortaǵa tastalǵan qaldyqtar 703,97 myń tonnany qurady. Bul aldyńǵy jylmen salystyrǵanda 3,2 paıyzǵa az. Mysaly Qazaqstan elektrolız zaýytyndaǵy qaldyqtar 6,41 myń tonnaǵa qysqardy. Bul óndiris ornyndaǵy tazartý quraldaryn jóndeý, jańartý jumystarymen baılanysty, - deıdi Pavlodar oblysy boıynsha ekologııa departamenti basshysynyń orynbasary Maǵzum Qoqymbaev.
Byltyr birinshi sanattaǵy kásiporyndar tabıǵatty qorǵaý sharalaryna 15,5 mlrd teńge josparlap, nátıjesinde 19 mlrd teńge ıgergen. Al bıylǵy jyldyń alǵashqy toqsanynda bul baǵytqa kásiporyndar 2,9 mlrd teńge jumsady.
Ekologııa departamenti ótken jyly jospardan tys 42 tekserý júrgizip, kásipkerlik sýbektilerinen 64 zań buzýshylyq anyqtalǵan. Olarǵa 42,9 mln teńge aıyppul salyndy.
