Ertis-Baıan óńirinde 9 aýyldyń turǵyndary áli kúnge uıaly baılanyssyz otyr
PAVLODAR. KAZINFORM — Pavlodar oblysyndaǵy 345 eldi mekenniń 336-sy uıaly baılanyspen qamtylǵan. Buǵan qosa bir aýyl ınternet jelisine qosylmaǵan.
Pavlodar oblystyq tsıfrlyq tehnologııalar basqarmasynyń dereginshe, 2025 jyly Ýspen aýdanynyń Bogatyr men Beloýsovka, Aqqýly aýdanynyń Jambyl, Aqsý qalasyna qarasty Aınakól jáne Pavlodar aýdanynyń Qarakól aýyldary 4G jelisimen qamtamasyz etilgen. Sondaı-aq Qaraaǵash, Qyzylqaq, Sileti, Shabar jáne Syntas aýyldarynda antenna-machtalyq qurylystar boı kótergen. Uıaly baılanys operatory tıisti qurylǵylardy ornatqannan keıin bul eldi mekenderdiń turǵyndary 4G LTE standartyndaǵy jelige qol jetkizedi.
— Investıtsııalyq joba aıasynda respýblıkalyq mańyzy bar avtokólik joldarynyń boıynda 12 antenna-machtalyq qurylys salý kózdelgen. Bul tas joldarda da, oǵan irgeles eldi mekenderde de uıaly baılanys sapasyn edáýir jaqsartýǵa múmkindik beredi, — dep habarlady basqarmadan.
Deı turǵanmen 9 aýyl áli de uıaly baılanyssyz otyr. Al Baıanaýyl aýdanynyń Aqshı aýylynda ınternet joq. Maı aýdanynyń Saty jáne Ýspen aýdanynyń Tobyljan aýyldaryn uıaly baılanyspen qamtamasyz etý merzimi uzaqqa sozylyp ketken. Sondaı-aq jergilikti atqarýshy organdar antenna-machtalyq qurylǵylaryn ornatyp qoıǵan Qyzylqaq, Sileti, Qaraaǵash, Shabar, Sahnovka jáne Baltasap aýyldarynda 4G LTE jelisin iske qosý sozbaqqa salynyp keledi.
Eske sala keteıik, Túrkistan oblysynda 32 eldi meken mobıldi ınternetpen qamtylmaǵan.
