Ertis-Baıan óńirinde 26 myńnan astam jumys ornyn qurý kózdelip otyr
PAVLODAR. KAZINFORM — Pavlodar oblysynda memlekettik jáne jeke jobalar aıasynda 26,7 myń jumys ornyn qurý josparlanǵan. Onyń ishinde 18,3 myńy turaqty bolady.
Óńirde Jumysshy mamandyqtar jylyn uıymdastyrý máseleleri pysyqtalyp jatyr. Bul turǵyda bilim berý mártebesin arttyrý, jastardyń shetelde tájirıbeden ótýine múmkindik jasaý, kásiporyndar men oqý uıymdary arasyndaǵy baılanysty odan ári nyǵaıtý kózdelgen.
— Ótken jyly 26,6 myń adamdy jumysqa ornalastyrý josparlanyp, nátıjesinde 30 myńnan astam adam jańadan «eki qolǵa — bir kúrek» tapty. Olardyń 74%-y turaqty jumys oryndary ekenin atap ótken jón. Jumyspen qamtylǵandardyń 94,5%-da mindetti zeınetaqy aýdarymdary bar. Al bıylǵy meje — memlekettik jáne jeke jobalar aıasynda 26,7 myń jumys ornyn qurý. Onyń ishinde 18,3 myńy turaqty bolady degen jospar bar, — deıdi oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Dısıýpova.
Aımaqta «WorldSkills» bolashaq chempıondar mektebi» qaǵıdaty boıynsha úzdik pedagogtar men stýdentter úshin shetelde taǵylymdamalar uıymdastyrylady, mektepterde «Enbek Hub» oqý sheberhanalary, orta bilim berý uıymdarynda 50 beıindik synyp ashylady. «Jańa mamandyqtar men quzyretterdiń óńirlik atlasy» jobasyn iske asyrý aıasynda kásiptik baǵdarlaý jumysynda, mektepter, kolledjder men kásiporyndar arasyndaǵy ózara qarym-qatynastyń perspektıvalyq modelinde jańa tásilder engizilmekshi.
Eske sala keteıik, Memleket basshysy 2025 jyldy Jumysshy mamandyqtar jyly dep jarııalaǵany málim.