Ertis-Baıan óńirinde 18 myń gektardan astam aýyl sharýashylyq jeri qunaryn joǵaltqan
PAVLODAR. KAZINFORM - Pavlodar oblysynda aýyl sharýashylyǵy maqsatyndaǵy jerlerdiń 40 paıyzy zerttelip, 18 myń gektardan astam alqaptyń degradatsııaǵa ushyraǵany anyqtaldy.
Qazir óńirde qunaryn joǵaltqan jerlerdi qalpyna keltirýdiń jol kartasy ázirlenip jatyr. Óńirlik jer qatynastary basqarmasynyń basshysy Murat Hamıtovtyń aıtýynsha, qujatty jyl sońyna deıin qabyldaý josparlanǵan. Ǵylymı negizde ázirlenetin jol kartasy jerdi qalpyna keltirýge qajetti shyǵyndardy eseptep, bıýdjetten qarjy bólýge ótinim berýge múmkindik beredi.
– Biz óńirde jerdi paıdalanýdyń negizgi qaǵıdattarynyń saqtalýyn, ıaǵnı alqaptardyń nysanaly maqsatyna saı qoldanylýyn jáne olardyń degradatsııaǵa ushyraýynyń aldyn alý sharalaryn turaqty baqylaýda ustaımyz. Monıtorıng topyraq qunarlylyǵynyń ózgerýin, erozııalyq protsesterdi, tuzdanýdy, qurǵaýdy, shóleıttenýdi jáne ósimdik jamylǵysynyń jaǵdaıyn qamtıdy, – deıdi basqarma basshysy.
Aýyl sharýashylyq alqaptaryn zertteý Jer resýrstaryn basqarý komıtetimen kelisilgen josparǵa sáıkes júrgizilip jatyr. Bul jumysqa «Jerlerge zerttep - qaraý jumystaryn júrgizý memlekettik ınstıtýtynyń» mamandary tartylǵan.
2022 jyldan beri olar Pavlodar oblysyndaǵy aýyl sharýashylyǵy jerleriniń 40 paıyzyn ǵana zerttegen. Aldyn ala málimetterge sáıkes, óńirde shamamen 16 myń gektar jer jel erozııasyna ushyraǵan.
Taǵy eki myń gektarǵa jýyq alqaptyń tuzdanǵany anyqtalǵan. Bul aýmaqtar oblystyń ártúrli aýdandarynda ornalasqan. Tuzdanǵan jerler negizinen Ertis ózeniniń boıyndaǵy Pavlodar, Ertis jáne Tereńkól aýdandarynda, sondaı-aq Aqqýly men Baıanaýyl óńirlerinde kezdesedi. Olardyń basym bóligi buryn sýarmaly eginshilikke paıdalanylǵan alqaptarǵa tıesili.
Buǵan deıin Aqtóbe oblysynda topyraq degradatsııasyna ne áser etkeni týraly jazǵanbyz.
