Ertis-Baıan óńirinde 1,5 myńǵa jýyq qara maldan brýtsellez anyqtalǵan

PAVLODAR. KAZINFORM — Veterınarlar 178 myń iri qara maldy tekserip shyǵyp, olardyń 0,8%-y brýtsellez aýrýyn juqtyrǵanyn rastaǵan. 

Óńirlik veterınarııa basqarmasynyń basshysy Asyltas Tileýbaevtyń aıtýynsha, qazirgi ýaqytta oblysta 178 myń bas iri qara mal tekserilip, olardyń 0,8%-y brýtsellez aýrýyn juqtyrǵany anyqtalǵan. Bul — 1,5 myńǵa jýyq mal aýrýǵa shaldyqqanyn bildiredi.

— Jalpy epızootııalyq jaǵdaı turaqty dep baǵalaımyz. 131 sibir jarasy men 239 mal qorymyna monıtorıng júrgizilip jatyr. Olardyń tek 33-i tıptik jáne veterınarııalyq-sanıtarııalyq talaptarǵa sáıkes keledi, qalǵan 206-sy eskirgen shuńqyrlar. Aýyl sharýashylyǵy mınıstrliginiń Jol kartasyn iske asyrý aıasynda jańa tıptik mal qorymdaryn salý, ınsıneratorlar satyp alý jáne maldy sanıtarlyq soıý úshin ınfraqurylymdy damytý josparlanǵan, — deıdi basqarma basshysy.

Basqarma mamandary Reseı Federatsııasy Altaı ólkesiniń bıologııalyq qaldyqtardy joıý tájirıbesin zerttep kórgen. Nátıjesinde kómirmen jumys isteıtin krematorlardy bizdiń oblysta qoldanýdy usynyp otyr. Álgindeı bir qondyrǵy iri qara maldyń ushasyn 5 saǵat ishinde joıady jáne oǵan jumsalatyn shyǵynnyń mólsheri 3 myń teńge. Al qoldanystaǵy ınsıneratorlarda bir maldy joıýdyń quny — 15 myń teńge.

Eske sala keteıik, Qostanaı oblysyndaǵy aýyldardyń birinde brýtsellezge baılanysty karantın engizildi.