Ertis basseıni aýmaǵynda zańsyz salynǵan 13 nysan joıylady

ASTANA. KAZINFORM — Sý resýrstary jáne ırrıgatsııa mınıstrligi Sý resýrstaryn retteý, qorǵaý jáne paıdalaný komıtetiniń Ertis basseındik sý ınspektsııasy memlekettik baqylaý sheńberinde zańsyz salynǵan nysandar úshin alty sýbektini ákimshilik jaýapkershilikke tartty. Bul týraly vedomstvonyń baspasóz qyzmeti málim etti.

Nátıjesinde, sottyń birinshi ınstantsııasynyń sheshimimen nysandy joıý týraly sheshim shyǵaryldy, onyń ishinde 8-i Abaı oblysynda, 4-eýi Shyǵys Qazaqstan oblysynda, 1-eýi Pavlodar oblysynda. Sonymen qatar quqyq buzýshylarǵa jalpy somasy 9 338 501 teńge kóleminde aıyppul salyndy.

– Ertis basseındik sý ınspektsııasynyń mamandary sý qoryn qorǵaý jáne paıdalaný salasyndaǵy zańbuzýshylyqtardy anyqtaý jáne jolyn kesý boıynsha júıeli jumys júrgizip keledi. Jańa Sý kodeksinde engizilgen memlekettik baqylaý salasyndaǵy jańa ókilettikter ınspektorlarǵa azamattardyń ótinishteri men sý zańnamasyn buzý faktilerine jedel áreket etýge múmkindik beredi, – dedi Ertis basseındik sý ınspektsııasynyń basshysy Medet Jádigeruly.

Aıta keteıik, Jetisý oblysynda 9 kanal rekonstrýktsııalanyp jatyr.