«Ertistiń» portýgalııalyq jartylaı qorǵaýshysy pavlodarlyq qyzǵa usynys jasady
PAVLODAR. QazAqparat - Pavlodarlyq klýbta oınaıtyn Karlos Fonseka pavlodarlyq Anjelıka Godjıevaǵa úılený jóninde usynys jasady, dep habarlaıdy pavlodarnews.kz.
Mundaı aqparat «Ertis» FK áleýmettik jelilerdegi resmı paraqshasynda jarııalandy. Jup qarym-qatynastaryn taıaýda zańdastyrmaq. Bul málimetti klýbtyń medıa-ofıtseri Darhan Bekishev rastady. 23 jastaǵy Anjelıka Godjıeva qalamyzdaǵy №17 mektebin bitirip, keıin InEÝ-de joǵary bilim alǵan. 2015 jyly «Mıss Pavlodar» konkýrsyna qatysqan. Karlos Manýel Koshta Fernandesh Fonseka 1987 jyly 23 tamyzda Portýgalııanyń Galegos kentinde týǵan. Fýtbolshy mansabyn «Santa-Marııa» klýbynda bastaǵan. 2015 jyly Bolgarııanyń «Slavııasynan» pavlodarlyq «Ertiske» aýysty. Karlos Fonseka tórt jylda «Ertis» sapynda 108 match ótkizip, 16 dop soqqan. Internet jelisindegi aqparat boıynsha bul oıynshynyń quny 500 myń eýrony quraıdy.
