Ertistiń erke qyzy, opera ánshisi Marııa Mýdrıak ónerimen álemdi moıyndatty
ASTANA. 2 qańtar. QazAqparat - On segiz jasynda Mılan konservatorııasyn úzdik aıaqtaǵan Marııa qazirde La Skala teatry janyndaǵy mýzyka Akademııasynda oqýyn jalǵastyryp jatyr.
Ónerimen álemdi moıyndatqan qyz operanyń otany Italııada álemdik juldyzdarmen ıyq tiresip, óner kórsetkeni óz aldyna, basty rolderdi oryndaýǵa da múmkindik alyp otyr.
Marııa úshin barlyq ataq-dańq mártebeden bıik turatyn qasıetti uǵym bar. Ol - týǵan jer. Ertistiń erke qyzynyń óneri - jerlesteri úshin maqtanysh. Qysqy demalysqa shyǵysymen týǵan ólkesine asyǵa, saǵyna jetken qyzdy úlken syı kútip turdy. Oblysymyzdyń rýhanı, mádenı ómirine úles qosqan daryndy jastarmen birge Marııa Mýdrıak ta Pavlodar oblysynyń 75 jyldyǵy mereıtoılyq medalimen marapattaldy.
Marııa - shetelde «Bolashaq» stıpendııasy arqyly oqyǵan daryndy jastardyń biri. Djýzeppe Verdı atyndaǵy Mılan memlekettik konservatorııasyn támamdap, Italııanyń eń úzdik jas ánshisi ataǵyna ıe boldy. Erteńin álemdik sahnamen baılanystyratyn jas qyzdyń bolashaqqa jospary kóp.
- Bıyl dıplom qorǵaǵannan keıin eki birdeı opera kompozıtory, maestro Chılıano jáne Danıelı maǵan ózderiniń operalarynda basty roldi oınaýǵa usynys jasady. Maestro Chılıano Valentıno jáne Margarıta operasynda, maestro Danıelı Gamlet operasynda basty áıel roli - Ofelııany somdadym., deıdi Djýzeppe Verdı atyndaǵy Mılan memlekettik konservatorııasynyń túlegi.
Marııa Mýdrıak opera mýzykasynyń aty ańyzǵa aınalǵan ókili Magda Olıveronyń arnaıy júldesin de qanjyǵasyna ildi.
Óner adamyna jaqyn keletin tákaparlyq Marııanyń boıynda múlde joq. Bizge ashqan qupııasy - eshqandaı dıeta ustamaıdy eken. Súıikti taǵamy - baýyrsaq pen besparmaq. Ómirlik ustanymy - adamdarǵa qýanysh syılaý, erinbeı talmaı eńbek etip, álem sahnalarynda án salý. Onyń alǵashqy oryndaǵan áni «Qazaq valsi» boldy, dep habarlaıdy 24 KZ.
