Ertistegi eski kópirmen ótetin júk kólikterine aıyppul salynady - Pavlodar
PAVLODAR. QazAqparat - Ertis ózeni arqyly Pavlodar jáne Aqsý qalalaryn baılanystyratyn eski kópir arqyly júk kólikteri ótken jaǵdaıda 3 AEK (7215 teńge) kóleminde aıyppul salynady.
Bul týraly jol-patrýldik polıtsııasynyń vzvod komandıri Sábıt Estaı aıtty, dep habarlaıdy pavlodarnews.kz.
«Búgingi kúnge deıin qansha júk kóligi bul erejeni saqtamaǵany ázirge beımálim. Degenmen arnaıy bazaǵa sol kópir arqyly ótken júrgizýshilerdiń aty-jónderi men qandaı baǵytta ótkeni tirkeledi. Olardyń naqty sany belgisiz», - deıdi Sábıt Estaı.
«Qazavtojol» UK AQ POF dırektorynyń orynbasary Aqylbek Qabyldınnyń aıtýynsha, eski kópir arqyly salmaǵy 10 tonnadan asatyn júk kólikteriniń ótýine 2017 jyldyń 20 jeltoqsanynan bastap tyıym salynǵan. Injenerlik qurylystyń eki jaǵynan da eskertý belgileri qoıylǵan. Qazirgi tańda kúrdeli jóndeý júrgizý maqsatynda joba daıyndalý ústinde. Bul jumystar 2019-2020 jyldarǵa josparlanǵan.
Eske sala keteıik, sońǵy ret eski kópirge 2004 jyly kúrdeli jóndeý jumystary júrgizilgen. Osyǵan sáıkes tek qana jeńil kólikterdiń ótýine ruqsat beriletin bolǵan. Jalpy, bul nysan apattyq jaǵdaıda dep baǵalanǵan.
