Ertis jaǵalaýyn tazartý boıynsha halyqaralyq ekologııalyq aktsııa bastaldy - ShQO
El Táýelsizdiginiń 30 jyldyǵy jáne «Igi ister marafony» jalpyulttyq jobasy aıasynda eriktiler «Bir-ózen, bir-taǵdyr» halyqaralyq aktsııasyn bastady. ShQO jastar resýrstyq ortalyǵynyń qoldaýymen aktsııaǵa oblys volonterleriniń front-ofısi, respýblıkalyq shtab jáne «Jasyl El» eńbek jasaqtarynyń óńirlik fılıaly qatysty.
Eriktilerdiń aıtýynsha, bul aktsııanyń negizgi maqsaty – adamdardy Ertis ózeniniń boıyndaǵy qalalar men eldi mekenderdegi sý arnalaryn tazartýǵa shaqyrý, ekologııany jaqsartý jáne jastarǵa tabıǵatty aıalaý kerektigin kórsetý.
Aktsııa Zaısan aýdanynan bastaldy. Aldaǵy kúnderi Kúrshim, Kókpekti, Katonqaraǵaı, Ulan, Glýbokoe, Shemonaıha, Besqaraǵaı, Altaı aýdandary men Óskemen, Semeı, Kýrchatov qalalarynda jalǵasady. Keıinnen Pavlodar oblysyna, al sol jerden Reseı Federatsııasyna jetpek.
Zaısan aýdanynda aktsııaǵa 100-den astam erikti men «Jasyl El» eńbek jasaqtarynyń ókilderi qatysty.
- Halyqaralyq aktsııanyń nátıjesinde úsh el arqyly ótetin Ertis ózeniniń boıynda ornalasqan qalalar men eldi mekender bir mezgilde tazalyq is-sharalaryn ótkizip, sonyń nátıjesinde ózendegi ekologııalyq jaǵdaı jaqsarady dep kútilýde. Biz osy sharany uıymdastyrý arqyly, halyqaralyq dostyqtyń arta túsýin qalaımyz, - deıdi Jastar resýrstyq ortalyǵynyń basshysy Araılym Esimbekova.
