«Ertis» Premer-lıgadaǵy ornyn saqtap qaldy
ASTANA. QazAqparat - Pavlodardyń «Ertis» fýtbol komandasy Premer-lıgadaǵy ornyn saqtap qaldy, dep habarlaıdy QazAqparat tilshisi.
Dál qazir Pavlodar qalasynda «Ertis» pen Shymkenttiń «Qyran» komandalary arasyndaǵy kezdesý aıaqtaldy. Atalmysh kezdesýde «Ertis» sapynan Arman Smaıylov pen Mılosh Stamenkovıch eki gol soqsa, oǵan «Qyran» qatarynan Abzal Serikjan bir golmen jaýap qaıyrdy. Esep - 2:1. «Ertis» jeńiske jetti. Osylaısha Premer-lıgadaǵy ornyn saqtap qaldy.
Ústimizdegi jyly «Ertis» óte sátsiz oıyn kórsetti. Týrnır kestesinde onynshy orynǵa áreń qol jetkizdi. Al «Qyran» birinshi lıgada úshinshi orynǵa turaqtady. Jarys talaby boıynsha Premer-lıgada 10-oryn alǵan komanda men birinshi lıgada úshinshi orynǵa turaqtaǵan ujym pleı-off kezeńinde joldama úshin sheberlik baıqasatyn. Aldyńǵy kezdesý Shymkent qalasynda ótip, onda «Ertis» 3:0 esebimen jeńiske jetken edi.
Buǵan deıin «Ertis» mundaı tómen nátıje kórsetken emes. Aıta keterligi, «Ertis» el birinshiliginde birde-bir márte birinshi topqa túsip kórgen joq.
Esterińizge sala ketelik, bıyl birinshi lıgadan Premer-lıgaǵa Kókshetaýdyń «Oqjetpesi» men Tarazdyń «Taraz» komandalary joldama aldy.
