«Ertis» premer-lıgada sońǵy ornynan kóterildi
PAVLODAR. QazAqparat - Pavlodarlyq fýtbolshylar syrt alańda qostanaılyq «Tobyldy» 2:1 esebimen utty, dep habarlaıdy pavlodarnews.kz.
Pavlodarlyqtar kezdesýdi alań qojaıyndarynan góri belsendirek bastady. «Tobyl» qorǵanysta kóbirek oınap, qarymta shabýyldarǵa sırek shyǵyp otyrdy. Týrnırlik mindetterin oryndap úlgergen qostanaılyqtar sylbyr oınady. Óz kezeginde «Ertistikter» de qojaıyndar qaqpasyna sonshalyqty qaýip tóndire qoımady. Osyndaı kórinis matchtyń sońǵy 20 mınýtyna deıin jalǵasty desek qatelespeımiz. 70-mınýtta «Ertis» qorǵaýshysy Rýslan Esimovtiń alań ortasynan bergen pasynan soń «Tobyl» qaqpashasy Dmıtro Nepogodov taıyp qulap, dopty pavlodarlyq jartylaı qorǵaýshysy Dorý Popadıýkke syılady. Rýmyn havbegi dopty bos qalǵan qaqpaǵa ońaı soqty - 1:0. Fýtbolǵa uqsas tartysty oıyn «Ertistiń» gol soǵýynan keıin bastaldy. Qostanaılyqtar kelesi shabýylda buryshtama dobyna ıe bolyp, esepti teńestirdi. Goldy baspen soqqan Tańat Nóserbaev - 1:1. Eki komandanyń oıynyna qan júgirgendeı bolǵan sátte «Ertis» kóshbasshy fýtbolshylarynyń biri Rýslan Esimov óz komandasyna taǵy bir márte kómekke keldi. 88-mınýtta Rodrıgodan pas qabyldaǵan ol aıyp alańyna enip, «Tobyl» qorǵaýshynyń áreketinen soń qulap tústi. Qostanaılyq qorǵaýshy tarapynan ereje buzyldy. Mılosh Stamenkovıch penaltıden múlt ketpedi - 2:1.
Match sońynda «Ertis» bas bapkeri Dımıtar Dımıtrov komandasynyń jeńisine kóńili tolatyndyǵyn aıtty. - Bul bizder úshin zor jetistik, - dedi Dımıtar Dımıtrov. «Degenmen, bizdi mańyzdy oıyndar kútip tur. Menińshe, jeńiske ábden laıyq boldyq. Alaıda, áli eshteńe sheshilgen joq».
Osy jeńisinen soń «Ertis» sońǵy ornynan 10-ǵa kóterildi. Kelesi matchty pavlodarlyqtar óz alańynda 21 qazan, jeksenbi kúni ótkizedi. Qarsylas - qyzylordalyq «Qaısar».
