Ertis ózenini jaǵasynda jasóspirimdi aman alyp qalǵan áıel marapattaldy

SEMEI. QazAqparat – Semeı qalasynda Ertis ózenininiń jaǵasynda dem ala almaı jatqan jasóspirimdi qutqarǵan áıel marapattaldy, dep habarlaıdy QazAqparat tilshisi.

Abaı oblysy tótenshe jaǵdaılar departamenti baspasóz qyzmetiniń málimetine súıensek, bul oqıǵa 13 shilde kúni qalanyń Zaton shaǵynaýdany jaǵyndaǵy Ertis ózeniniń jaǵasynda bolǵan.

«Sol kúni aýa temperatýrasy 45 gradýstan asyp ketken. Aptap ystyqta jaǵajaıda demalýshylardyń qarasy kóp boldy. Balalarymen jaǵalaýda demalyp jatqan Aınur Sadyrbalına kómekke shaqyrǵan daýysty estıdi. Ol esh oılanbastan kóp adam shoǵyrlanǵan jerge qaraı kómekke umtylady», - delingen aqparatta.

Barsa bir er adam jasóspirimge alǵashqy kómek kórsetip jatyr eken. Alaıda kórsetilip jatqan kómekke qaramastan jasóspirim es-tússiz boldy. Onyń denesi kókshildenip, tynysy toqtap qalǵan.

«Bet-álpetinen sýǵa batqan adamnyń barlyq belgileri baıqalǵan. Osy sátte Aınur jasóspirimdi birden reanımatsııalaýǵa kirisken. Sóıtip ony aman alyp qaldy. Bul sátte sál ǵana keshikkenniń ózi balanyń ómirine orasan zor qaýip tóndirýi múmkin edi», - delingen habarlamada.

Adam janyn ajaldan arashalaǵan Aınur Sadyrbalınany Abaı oblysy tótenshe jaǵdaılar departamentiniń basshylyǵy «Sýǵa ketkendi qutqarǵany úshin» medalimen marapattady.