Ertis ózenine qurylys qaldyqtary tógilgen
PAVLODAR. QazAqparat – Pavlodarda kásipkerge jalǵa berilgen ýchaskede qurylysta paıdalanylǵan qaldyqtar Ertis ózenine tastalǵan, dep habarlaıdy QazAqparat tilshisi.
Júk tıeýshi dúkendi salý úshin bólingen jerge qoqys tókken.
«Búgin áleýmettik jelilerde Ertis ózenine qurylys qaldyqtary tastalǵany týraly vıdeo tarady. Oqıǵa ornyna jergilikti polıtsııa men Pavlodar qalasynyń sáýlet jáne qala qurylysy bóliminiń qyzmetkerleri bardy», - dep habarlady Pavlodar ákimdiginiń baspasóz qyzmetinen.
Qalalyq ákimshiliktiń málimetteri boıynsha Sátbaev kóshesi, 336/2 mekenjaıynda ornalasqan ýchaskede dúken qurylysy júrgizilýde. Aýdany 0,1409 gektar jer 2020 jyly aýktsıon arqyly úsh jyl merzimge ýaqytsha paıdalanýǵa berildi. Aýmaqtyń maqsaty – dúken salý jáne onyń qyzmet kórsetýi.
«Qurylys qoqystaryn ózenge tastaý faktisi boıynsha ákimshilik hattama toltyryldy, menshik ıesi abattandyrý qaǵıdalaryn buzǵany úshin QR ÁQBtK-niń 505-baby boıynsha ákimshilik jaýapkershilikke tartylady. Sondaı-aq materıal Ekologııa departamentine joldanatyn bolady», - dep tolyqtyrdy oblys ákimdiginen.
Qalalyq ákimdiktiń aqparaty boıynsha, menshik ıesinde qurylys-montajdaý jumystarynyń bastalǵany týraly habarlama talon joq, sondyqtan ákimshilik sharalar qabyldaý úshin materıaldar Pavlodar oblysynyń Qala qurylysy jáne jerdi baqylaý basqarmasyna beriletin bolady. Bul aqparatty Pavlodar oblysynyń Polıtsııa departamenti de rastady.
«Sondaı-aq, qurylys ıesi jaǵalaýdy tazartatyn bolady», - dep atap ótti polıtsııadan.
