Ertis ózenine álemdik ekologııalyq apat qaýpi tónip tur - Ǵ. Esim
ASTANA. 20 maýsym. QazAqparat - Jedel sharalar qabyldanbasa Ertis ózenine álemdik deńgeıdegi alapat ekologııalyq qaýip tónip tur.
Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Ǵarıfolla Esim osylaı málimdedi.
«Meniń saýalym Ertis ózenine tónip turǵan ekologııalyq qaýipke baılanysty. Ótken ǵasyrdyń jetpisinshi jyldarynyń sońynda Semeı qalasynyń shetinde ornalasqan áskerı aerodromnyń janarmaı qoımasynan jer astyna sińgen avıakerosınnen qordalanǵan kerosın kóli alty myń tonnaǵa jetip, Ertis ózenine jaqyndap kele jatqany «Egemen Qazaqstan» gazetinde jazylǵan edi. 2002 jyly almatylyq «Kazgıdek» fırmasy atalǵan problemany zertteýdi qolǵa alsa, bir jyldan keıin astanalyq mamandar atalǵan qaýipti zalalsyzdandyrýǵa kirisip, Úkimet tarapynan 36 mıllıon qarjy jumsalǵan bolatyn. Alaıda bul arqyly jer betine 100 tonnadaı ǵana jarnarmaıdy shyǵarý múmkindigine qol jetkizilgen. 5900 tonna janarmaı qaldyǵy jer astynda qalyp otyr. Qazir Ertis ózenine úlken ekologııalyq qaýip tónip tur», - dedi senator.
Onyń aıtýynsha, budan bólek, Semeı qalasyndaǵy qoqys, laı aralas aǵatyn qubyrlardan aqqan sý Ertiske quıylyp, bul da bir jaǵynan ekologııalyq qaýip tóndirip otyr. Soǵan oraı, Semeı qalasynan tómenirek jerden ustalǵan balyq eti adam aǵzasyna zııanyn tıgizip, halyq ony tutynýdan bas tartyp jatqan kórinedi.
«Eger tez arada arnaıy saraptama jasap, zertteýler júrgizip, aldyn alý sharalaryn qolǵa almasa, Ertis ózenine álemdik ekologııalyq apat qaýpi tónip tur. Jer asty sýlaryn lastap, Ertiske jaqyndap, 100 metrdeı ǵana qalǵan jer asty kerosın kóliniń úlken ekologııalyq apatqa ákelip soqtyrmaýy úshin atalmysh máseleni tekserip,oń sheshim qabyldaýdyń múmkindikterin qarastyrý qajet», - dedi depýtat.
