Ertis ózeninde sýquzǵyndar balyqtardy qurtyp jatyr
Redaktsııaǵa vıdeo joldaǵan jergilikti turǵyndardyń aıtýynsha, Ertis alqabynda myńdaǵan qus mekendeıdi. Áıgili qanattylar kishkentaı balyqtardy jep qoısa, úlkenderin jaǵaǵa laqtyrady. Pavlodar oblysy aýmaqtyq orman sharýashylyǵy jáne janýarlar álemi ınspektsııasynda sýquzǵyndarynyń kóbeıýine qatysty máseleni Qazaqstannyń ǵalymdary qarastyryp jatqanyn aıtty. Bir aı buryn Ertis óńirinde osy taqyrypqa baılanysty dóńgelek ústel ótken. Oǵan oblystyq aýmaqtyq ınspektsııa, tabıǵatty qorǵaý prokýratýrasy, Baıanaýyl aýdany ulttyq parki, orman jáne janýarlar álemin qorǵaý mekemesi jáne «Ertis ormany» rezervatynyń ókilderi, óńirdegi qoryqshylar men kúzetshiler qatysqan.
«Erteń ǵalymdarmen birge Maı aýdanyna shyǵý josparlanyp otyr», - deıdi aýmaqtyq ınspektsııasy ańshylyq sharýashylyǵy jáne janýarlar álemi bóliminiń basshysy Arman Muqataev. «Bul qustardan tabıǵatqa qandaı da bir zııan kele me ekenin anyqtaǵymyz keledi. Ol úshin bıologııalyq zertteý júrgizip, ekologııalyq saraptamaǵa jiberý kerek. Ázirge qustar Ertis alqabynda ózderin jaıly sezinedi. Bir sýquzǵyn táýligine bir kelideı balyq jeıdi. Munda jaqsy qorek bar, ańshylyqqa tyıym salynǵan, eshkim qustardy mazalamaıdy. Degenmen sýquzǵyndar Pavlodar oblysynyń aýmaǵynda uıa salmaıdy. Olar munda úsh jyl buryn paıda bolǵan. Bul - qonys aýdaratyn qustar. Bizge Semeıden ushyp kelgen. Erteńgi tekseristi ótkizýge Maı aýdanynyń qoryqshylyq qyzmeti usynys jasady».
Ázirge basqa aýdandardan shaǵym túspegen. Dese de, ekologtar ashqaraq qustarǵa qatysty máseleni sheshýge asyqpaıdy, sebebi sýquzǵyndary Reseıdegideı joǵalyp bara jatqan túrine kirýi múmkin. Qazaqstandyq sarapshylar basqa elderdiń tájirıbesin zerttegen. Másele, Baltyq jaǵasyndaǵy ǵalymdar bul máseleni otshashýlar arqyly sheshken. Otshashýdan qatty shoshyǵan qustar tipti, uıalaryn tastap ushyp ketken. Pavlodar oblysyna mundaı tájirıbe jaramaıdy, sebebi munda olardyń uıalary joq. - Qazirgi tańda sýquzǵyndaryn baqylanatyn qustardan ańshylyq túrine engizý máselesi kóterilýde, - deıdi ınspektsııada.