Ertis ózeninde seń júrdi
SEMEI. QazAqparat - Semeıde ShQO Tótenshe jaǵdaılar departamentiniń qutqarý bólimsheleri Ertis jaǵalaýy boıynda ornalasqan kentter men saıajaılardy táýlik boıy baqylaýǵa aldy, dep habarlaıdy QazAqparat tilshisi.
Qaladaǵy Derjınskıı kenti Shorsa kóshesindegi turǵyn úılerden sýdy sorý jáne bóget jasaý, ınertti materıaldardy tógý jumystary jalǵasyp jatyr.
Sondaı-aq búgin Ertis ózeninde keptelip qalǵan seńdi jarý jumystary bastaldy. Bul úshin 3 tonnadan artyq jarylǵysh zat jetkizildi.
«Biz úshin seńniń ózdiginen júrgeni jaqsy. Al jarylys jumystaryn muz keptelgen tustarda júrgizip jatyrmyz», - deıdi Tótenshe jaǵdaılar departamentiniń baspasóz hatshysy Anastasııa Sklıar.
Aıta keteıik, keshe Semeıde oryn alǵan sý tasqynynan bir kún ishinde 160-tan astam adam qaýipsiz jerge kóshirildi. Barlyǵy evakýatsııalyq pýnktterge ornalastyryldy.
Al sý basqan Shemonaıha jáne Glýbokoe aýdandarynda sý deńgeıi tómendep, qaýip seıildi. Qazir sýdy sorý jumystary jalǵasýda. Qutqarý qyzmetteri sonymen qatar Zyrıan jáne Qatonqaraǵaı aýdandaryndaǵy jaǵdaıdy da baqylaýda ustap otyr. Keshe «Berel-Rahman qaınarlary» jolynyń boıynda qar kóshkininiń aldyn alý jumystary júrgizildi. Nátıjesinde 16 myń tekshe metr qar shyǵaryldy.
Óskemen qalasyndaǵy Daǵdarys ortalyǵynda 8 (7232) 55-38-19 senim telefony jumys isteýde.
