Ertis ózenin tazalaǵan «Jasyl el» jasaǵynyń sarbazdary Jasybaı kóline kiristi
ASTANA. QazAqparat - Tabıǵatty tazalaý aktsııasy aıasynda Baıanaýyl aýdanyndaǵy Jasybaı kólin tazartýǵa «Jasyl eldiń» alty sarbazy jumyldyryldy, dep habarlaıdy pavlodarnews.kz .
Oblystyq jastar saıasatyn damytý basqarmasynyń ınspektory Sanıra Júsipovanyń aıtýynsha, kól túbindegi turmystyq zattardy shyǵarý jumysy ár aptanyń sońynda júrgiziledi. -Basty maqsatymyz - tabıǵatty qorǵaý jáne alys-jaqynnan kelip jatqan týrısterge qolaıly jaǵdaı jasaý. Ózen, kólderdi turmystyq qaldyqtardan aryltý máselesin alǵash biz 2015 jyly kóterip, sodan beri jyl saıyn júrgizilip keledi. Bıylǵy aktsııa 2 maýsymda bastalyp, bir apta boıy Ertis ózenin tazaladyq. Onda 20 adam jumys istedi. Al Jasybaıǵa kelgeli eki kún boldy. Alǵashqy eki kúndik jumysta elý qap qoqys shyǵaryldy. Onyń ishinde úıdiń shirip ketken batareıasy, syranyń bótelkeleri, shyrynnyń bótelkeleri jáne basqa da kıim-keshekter bar. Shyǵarylǵan qoqystardy ınspektorlar arnaıy oryndarǵa tókti. Bıyl munda «Jasyl el» jasaǵynyń sarbazdary on kún jumys isteıdi, - deıdi Sanıra Júsipova.
Oblystyq «Jasyl el» shtabynyń tóraǵasy Rahat Qappasovtyń sózine qaraǵanda, aktsııaǵa qatysýshylar aldymen Pavlodar memlekettik ınstıtýtynyń basseıinde jattyǵý jasap, sý astyna súńgýdi, zattardy tabýdy úırengen.
«PNHZ janyndaǵy «Daıvıng» jasaǵynyń basshysy bizdiń jastarmen eki apta boıy jumys jasap, sý asty tazalyǵyn júrgizýdi úıretti. Sonyń arqasynda olar qandaı tereń sý bolsa da túbinde jatqan qoqystardy alyp shyǵa alady. Alty sarbazdyń tórteýi sýǵa súńgise, ekeýi jaǵalaýdaǵy qoqystardy jınastyryp júr. Ákimdik tarapynan qosymsha qarajat bólinetin bolsa, biz munda kúzge deıin jumys jasaýǵa ázirmiz, -deıdi Rahat Qappasov.
