Ertis ózeni arqyly ótetin muz joldary ashyldy - Pavlodar oblysy
PAVLODAR. QazAqparat - Óńir aýmaǵynda Ertis ózeni arqyly muz joldary, júk tasıtyn jáne jaıaý ótpe joldary qyzmet ete bastady, dep habarlaıdy pavlodarnews.kz.
Oblystyq tótenshe jaǵdaılar departamentiniń jetkizgen málimetine súıensek, muz ótkeli Ertis aýdanynda resmı túrde jumys isteı bastady.
«Ondaǵy muzdyń qalyńdyǵy 44-45 sm quraıdy, úsh tonnaǵa deıin júk kótere alady. Oblystyń ózge aýdandarynda resmı túrde ruqsat etilgen muz ótkelderi ázirge ashylǵan joq»,- deıdi TJD ókilderi. Muz ótkelderine qoıylatyn talaptar QR Іshki ister mınıstrliginiń qaýipsizdik erejelerimen retteledi. Ótkelderge bólingen oryndar 25-30 metr qashyqtyqta ornalasqan mańdaıshalarmen belgilenýi tıis. Ótkelderdiń eki jaǵynan qulamalarynda arnaıy qalqandarǵa qysqy qural-jabdyqtar (bagrler, baspaldaqtar, qutqarý sheńberleri, bóreneler) qoıylýy qajet. Ótkeldiń paıdalanýǵa jaramdylyǵyna keletin bolsaq, muzdyń qalyńdyǵy 45-50 santımetrden kem bolmaýy tıis. Muz ótkelderinen ótý kezinde kólik quraldarynyń jyldamdyǵy saǵatyna 10 km-den aspaýy kerek. Avtomobıl jolaýshylary jaıaý júrýi, al júrgizýshi kóliktiń esikterin ashyp, qaýipsizdik beldigin bosatyp júrgizýi tıis.
