Ertis ormanyndaǵy órt oqshaýlandy

ASTANA. QazAqparat – Órt sóndirýshiler Ertis ormanynda oryn alǵan qurǵaq aǵash órtin jedel oqshaýlady, dep habarlaıdy QazAqparat QR Tótenshe jaǵdaılar mınıstrliginiń baspasóz qyzmetine silteme jasap.

2023 jylǵy 4 shildede saǵat 15.28-de Sharbaqty aýdanyndaǵy «Ertis-Ormany» ormanshylyǵynda jalpy aýdany 1,4 ga qurǵaq aǵashtar jandy.

Ormanshylar ishki baılanys arnasy arqyly TJD qyzmetkerlerine jedel aqparat berip, órt sóndirý qyzmeti dereý tótenshe jaǵdaı ornyna bardy.

Oqıǵa ornynda ormanshylyq qyzmetkerlerine Pavlodar oblysy TJ departamentiniń jeke quramy men tehnıkasy kómek kórsetýde.

Órt sóndirýshiler men orman sharýashylyǵy qyzmetkerleriniń arqasynda órt saǵat 18:05-te oqshaýlandy. Órttiń taralý qaýpi joq. Órtti sóndirý jumystary jalǵasýda.

Tótenshe jaǵdaılar departamentiniń qyzmetkerleri órt qaýpin azaıtý úshin órt qaýpi bar kezeńde ormanda qaýipsizdik erejelerin saqtaýdy usynady.