«Ertis ormany» rezervatynda órt bolyp jatyr

ASTANA. QazAqparat – «Ertis ormany» rezervatynda órt bolyp jatyr, dep habarlaıdy QazAqparat.

QR Tótenshe jaǵdaılar mınıstrligi baspasóz qyzmetiniń habarlaýynsha, 15 shilde kúni Sharbaqty aýdanynyń Stepnoe jáne Baýyrtal ormanshylyqtarynda ormanda órt shyǵyp, qoıý tútin baıqaldy.

Tótenshe jaǵdaılar mınıstri men oblys ákimi aýmaqty áýeden barlady. 98 oramdaǵy órt erekshe baqylaýda, onda órt kúsheıip barady.

«Ertis ormany» rezervatynyń aqparatyna sáıkes, áýeden barlaý nátıjesinde órtengen aýmaqtyń aldyn ala aýdany 850 gektrady qurady.

Oqıǵa ornynda 100-den astam tehnıka men 300-den astam adam, onyń ishinde 5 tikushaq órtti sóndirýde. Bir táýlik ishinde órt oshaqtaryna áýeden 22 ret jalpy kólemi 66 tekshe metr sý tógildi.

Órtti sóndirýge Astana qalasy, Qaraǵandy jáne Shyǵys Qazaqstan oblystary TJD kúshteri men quraldary jumyldyryldy.