«Ertis ormany» rezervaty bas dırektorynyń orynbasary para alǵany úshin sottaldy

PAVLODAR.QazAqparat - «Ertis ormany» rezervaty bas dırektorynyń orynbasary para alǵan. Pavlodar oblysy boıynsha Ekonomıkalyq tergeý departamenti onyń aǵash kesý kezinde «qamqorlyq» kórsetkeni úshin jáne ormandy tazartý boıynsha qosymsha jumys kólemin alǵany úshin aǵash óńdeýshiden mıllıon teńge alǵanyn anyqtady, dep habarlaıdy QazAqparat tilshisi.

«Pavlodar oblysy boıynsha Ekonomıkalyq tergeý departamenti arnaıy jedel is-sharalar júrgizý barysynda «Ertis Ormany» RMM basshylyǵynyń zańsyz áreketiniń jolyn kesti», - dep habarlady oblystyq ETD.

«Ertis ormany» rezervaty bas dırektorynyń orynbasary Qaırıden Ábjatov aǵash kesýshilerdiń birinen kartochkalyq shotqa aýdarý arqyly 1 000 000 teńge kóleminde zańsyz aqshalaı syıaqy alǵan», - dep atap ótti departamentte.

«Aqsha aǵash kesý jumystary kezindegi jalpy qamqorlyqqa, sondaı-aq ormandy tazartý boıynsha jumystardyń jańa kólemin alýǵa tólengen. Ábjatov alǵan aqshany jeke maqsatyna paıdalanǵan», - dep tolyqtyrdy departament.

Pavlodar oblysy Sharbaqty aýdandyq soty Q.M. Ábjatovqa orman sharýashylyǵy salasynda 2 jyl merzimge basshylyq laýazymdardy atqarý quqyǵynan aıyra otyryp, bir jyl bas bostandyǵyn shekteý túrindegi jaza taǵaıyndady.