Ertis óńirine josparlanǵan asyl tuqymdy maldyń 72 paıyzy jetkizildi
«Eń joǵary kórsetkish boıynsha aberdın-angýs tuqymdy 606 bas sıyr satyp alǵan baıanaýyldyq «Jaıma» JShS kósh bastap tur. Budan keıin 520 bas ákelgen Aqqýlydan «Altaı» sharýa qojalyǵy men etti baǵyttaǵy 200 bas sıyr jetkizgen Sharbaqty aýdanyndaǵy «Pobeda» seriktestigin atap ótýge bolady. Bul maldardyń barlyǵy Reseıden satyp alyndy. Al, jelezındik «Pahar» JShS Germanııadan 597 bas sútti baǵyttaǵy golshtıno-frız sıyryn alǵan. Jalpy, 2018 jyly oblys boıynsha josparlanǵan 3700 bas asyl tuqymdy maldyń 72 paıyzy jetkizildi», - dedi Tilekbol Sharapatov.
Máselen, Tereńkól aýdany kásipkerlik jáne aýyl sharýashylyǵy bóliminiń mal sharýashylyǵy jónindegi bas mamany Qurman Ahmetov aýdanda «Sybaǵa» baǵdarlamasy boıynsha josparlanǵan 888 asyl tuqymdy mal basynyń 392-si jetkizilgenin aıtty.
«KazPromAgro» JShS memlekettik «Sybaǵa» baǵdarlamasy boıynsha 500 asyl tuqymdy mal ákelýdi josparlaǵan bolatyn. Qazirgi ýaqytta Reseıdiń Brıansk oblysynan 322-si ákelingen. Barlyǵy aberdın-angýs tuqymdy sıyrlar. Qalǵandaryn júk kóliginiń bosamaýyna baılanysty aldaǵy kúnderi ákelmek. Atalmysh sharýa qojalyǵynda qazirgi kezde 554 bas asyl tuqymdy sıyr bar. Onyń 232-si - aqbas sıyrlar. 2016 jyly qurylǵan seriktestik egin jáne mal sharýashylyǵy salasynda nátıjeli jumys jasasýda», - dedi Qurman Ahmetov.
Budan basqa, aýdandaǵy «Ereke» sharýa qojalyǵy aberdın-angýs sıyrlarynyń josparlanǵan 200 basynyń 70-in Reseıdiń Krasnoıarsk ólkesinen satyp alǵan.
«Memlekettik baǵdarlama aıasynda «Karına» ShQ - 80, «Sıvýhın» ShQ - 50, «Agro Kolos» JShS - 58 bas ákelý kerek bolǵan. Alaıda, atalmysh qojalyqtar asyl tuqymdy maldaryn áli ákelip úlgergen joq. Bul keshiktirilýdiń sebebi, asyl tuqymdy maldardy satyp alǵan kezde, Reseıden shyǵarmas buryn veterınarlyq-sanıtarlyq talaptarǵa saı birneshe kezeńnen turatyn tekserýleri bar. Oǵan qosa, elimizge ákelgen sátte de tekserýden ótkiziledi. Sondyqtan bul jumystarǵa kóp ýaqyt ketedi», - deıdi Qurman Ahmetov.
