Ertis óńirine OQO-dan 300-den astam adam kóship keldi
PAVLODAR. QazAqparat - Ertis óńirine elimizdiń ońtústik aımaqtarynan 75 otbasy qonys aýdarǵan. Bul týraly oblystyq ákimdikte ótken keńeıtilgen otyrysta óńirlik jumyspen qamtýdy úılestirý jáne áleýmettik baǵdarlamalar basqarmasynyń basshysy Qaırat Nurmaǵambetov aıtty, dep habarlaıdy pavlodarnews.kz.
«Búgingi tańda qonys aýdarǵandardyń sany 335 adamǵa jetti. Degenmen, bul baǵytta keıbir aýdandar durys jumys jasamaı otyr. Mysaly, Maı aýdanyna birde-bir otbasy qonys aýdarmaǵan. Sharbaqty aýdanynda úsh otbasy, Jelezın aýdanyna bir otbasy ǵana keldi. Sondyqtan aýdandar men qalalardyń ákimderine sol jaqta túsindirý jumystaryn júrgizýdi usynamyn. Sebebi, ákimderdiń ózderi barǵan jaǵdaıda nátıjesi jaqsy bolar edi»,- dedi Qaırat Nurmaǵambetov.
Basqarma basshysynyń mundaı usynysyna oblys ákimi Bolat Baqaýov buǵan tek ákimder ǵana emes, densaýlyq saqtaý salasynyń ókilderi men bas dárigerler de atsalysýy tıis ekenin atap ótti. «Jarty jyldyq boıynsha esepterińizdi tyńdaıtyn bolamyn», - dedi Bolat Baqaýov. - Búginde 256 bos jumys oryny tur. Sol úshin jaýap beresizder. Bir jarym aıdyń ishinde osy baǵytta jumysty retteýdi tapsyramyn. Qazirgi kúni kóktemgi dala jumystaryna mehanızatorlar jetpeıdi. Sondyqtan qonys aýdarýshylardy otbasylarmen birge shaqyrý kerek».
Eske sala keteıik, 2017-2021 jyldarǵa arnalǵan «Nátıjeli jumyspen qamtý jáne jappaı kásipkerlikti damytý» baǵdarlamasy aıasynda úkimet tarapynan kóship kelgen adamdarǵa 35 AEK kóleminde birrettik tólemaqy bekitilgen jáne 12 aıdyń ishinde baspana jaldap turýǵa qarajat bólinedi. Úı satyp alýǵa nıet bildirgenderge kelisimshart negizinde shaǵyn sýbsıdııa, áleýmettik sala qyzmetkerlerine arendalyq úı usynylady. Oralmandar men ishki qonys aýdarýshylarǵa bólinetin kvota sany bıylǵy jylǵa 460 otbasyna deıin eselengen. Bul shamamen 1800-den astam adam. Bes jyldyń ishinde Pavlodar oblysyna jumys kúshi artyq óńirlerden 15000-nan astam otbasyn kóshirý josparlanyp otyr.
