Ertis óńirindegi 400 myń gektar sýarmaly jerdi ıgerý ónimdi bes esege arttyrady - Arman Evnıev
PAVLODAR. QazAqparat - Ekibastuzda ótken Neo Nomad iskerlik oıynynda QR Aýyl sharýashylyǵy vıtse-mınıstri Arman Evnıev et baǵytynda mal sharýashylyǵyn damytý baǵdarlamasyn tanystyrdy, dep habarlaıdy pavlodarnews.kz.
Semınarǵa Pavlodar oblysy ákiminiń orynbasary Dáýren Mahajanov jáne aımaqtaǵy aýylsharýashylyǵy óndirýshileri, bordaqylaý alańdarynyń basshylary, seriktes fermerler, oblystyq, aýdandyq ákimdikter men qarjy ınstıtýttarynyń ókilderi qatysty.
«Búgingi sapardyń maqsaty - sharýashylyqtarǵa jańa baǵdarlamanyń maǵynasy men talaptaryn jetkizý. Ásirese, et jáne mal sharýashylyǵy, jaıylymdyq jerlerdiń jaǵdaıy, maldy qaıdan ákelýge bolatyny men tıimdiligi sııaqty máseleler keńinen talqylandy. Sonymen qatar, naqty qoldanylatyn sharalar men memleket tarapynan kórsetiletin qoldaý túrleri, tapsyrýǵa qajet qujattar tizimi týraly aıtyldy. Memlekettik qyzmetshiler men fermerlerdiń, qarjy ınstıtýttarynyń áreketteri taqyrybynda sóz qozǵaldy»,- deıdi Arman Evnıev. -
Ár aýdannan bes komandanyń qatysýymen ótken iskerlik oıyn shynaıy jaǵdaıǵa negizdelgen túrde uıymdastyryldy. Osynyń nátıjesinde árbir adam belgili bir erejeler sheńberinde sheshim qabyldap, alǵa qoıǵan maqsatyna qol jetkizdi. Áleýmettik jelelerdegi tikeleı kórsetilim arqyly kórermender ózderine unaǵan komandaǵa daýys berdi. Olardyń daýystary jeńimpazdy anyqtaý barysynda esepke alyndy. - Oblys ákimdigi usynǵan málimetke súıensek, Ertis óńirde 100 myńnan astam jaıylymdyq jer bar, - deıdi vıtse-mınıstr. - Búgingi tańda bizdiń aldymyzda respýblıka boıynsha 18 myń fermerdiń sanyn 100 myńǵa, 57 mıllıon gektar qoldanystaǵy jerdi 100 mıllıon gektarǵa deıin jetkizý mindeti tur. Al, Pavlodar oblysynda bul maqsatty júzege asyrý úshin barlyq múmkindik bar. Aldaǵy bes jylda eńbek ónimdiligin 2,5 esege arttyrý kózdelip otyr. Ol úshin bul aımaqtyń áleýeti joǵary. Sebebi, Ertistiń eki jaǵasynda 400 myń gektar sýarmaly jerdi ıgerýge bolady. Osy alqapty aldaǵy ýaqytta iske qossaq, 10 jyldyń ishinde óndiriletin ónim kólemi 2,5 emes, bes esege deıin artady».
Vıtse-mınıstrdiń aıtýynsha, elimizdegi 1 mln 400 myń ga sýarmaly jer qoldanystaǵy aýyl sharýashylyǵy salasyndaǵy jer kóleminiń 7 paıyzyn ǵana quraıdy. ıAǵnı, 7 paıyz jerden 42 paıyz ónim óndiriledi.
Aıta keterligi, Pavlodar oblysy - elimiz boıynsha Neo Nomad iskerlik oıyny ótkizilip otyrǵan tórtinshi aımaq. Buǵan deıin Aqmola, Qaraǵandy jáne Qostanaı óńirlerinde uıymdastyrylǵan mundaı ádis bir komandaǵa birigip, ortaq maqsatqa qol jetkizýge múmkindik beredi.
