Ertis óńirinde sońǵy kúnderi birneshe adam sýǵa ketti
PAVLODAR. QazAqparat - Shomylý maýsymy bastalǵaly Pavlodar oblysynda 23 adam sýǵa ketken. Onyń toǵyzy bala, dep habarlaıdy pavlodarnews.kz.
Pavlodar oblystyq TJD málimdeýinshe, 4 tamyz kúni saǵat 11:30-da Tereńkól aýylynda 2011 jyly týǵan balanyń denesi tabylǵan. Bala 2 tamyz kúni saǵat 12:00-de sýǵa batyp ketken.
Tótenshe jaǵdaılar departamentindegilerdiń aıtýynsha, bala ata-anasynyń qaraýynsyz shomylǵan. Úıi Ertis ózenine jaqyn mańda bolǵan. Anasy jumysta júrgen kezde balalarmen birge shomylýǵa barady. Dál sol kúni reıdtik sharalar barysynda Pavlodarda TJD qutqarýshysy men kýáger Ertis ózeninde 11 jastaǵy balany aman alyp qaldy. - 4 tamyzda saǵat shamamen 15:45-te TJD qutqarýshy top basshysynyń orynbasary Serik Sherııazdanov áıel adamnyń ózendegi shekteý qoıylǵan belgi tusynda qalqyp turǵan adam denesine shoshynǵan kúıde júgirip bara jatqanyn baıqaǵan, - dedi TJD baspasóz qyzmetinde. – Ony kórip Serik Sherııazdanov adamdy qutqarý úshin sýǵa sekirgen. Sol kezde taǵy bir er adam batyp bara jatqandarǵa kómekke umtylǵan. Balaǵa ekeýi de qatar jetken. Balany jaǵaǵa alyp shyǵyp, reanımatsııalyq áreketter jasaǵan. Jedel járdem kelgenshe balany klınıkalyq ólim jaǵdaıynan shyǵarǵan. Olarǵa TJD qutqarýshysy, medıtsınalyq bilimi bar Aleksandr Fýrgonov kómektesken. Medıkter jetkenshe bala ózdiginen tynys aldy. Belgili bolǵandaı, bala jaǵalaýǵa tátesi jáne aǵasymen birge kelgen. Olar balany nazardan shyǵaryp alǵan.
Sondaı-aq 2 tamyz kúni saǵat 14:09-da Aqsýdaǵy Ertis arnasynda 38 jastaǵy er adamnyń denesi tabyldy. - 1981 jylǵy er adam boljam boıynsha mas kúıde bolǵan. Ol ruqsat etilmegen orynda shomylǵan. Sonymen qatar, Maı aýdanynyń Maıtúbek aýylynda 27 shilde kúni saǵat 14:30-da Ertis ózenine batyp ketken 71 jastaǵy zeınetkerdi izdeý jumystary jalǵasýda. TJD bergen aqparat boıynsha shomylý maýsymy bastalǵaly 23 adam sýǵa batyp ketken.
