Ertis óńirinde ótken táýlikte úsh adam sýǵa batyp ketti
NUR-SULTAN. QazAqparat - Ertis óńirinde ótken táýlikte úsh adam sýǵa batyp ketti. Aldyn ala derek boıynsha barlyǵy mas kúıde bolǵan, dep habarlaıdy pavlodarnews.kz.
Bul týraly oblystyq TJD málim etti.
- 5 tamyz kúni saǵat 16:32-de Ekibastuzdyń aýyldyq aımaǵynda Q.Sátpaev atyndaǵy arnadan kýágerler 1983 jylǵy er adamnyń denesin alyp shyqqan. Boljam boıynsha ol mas kúıde sýǵa shomylǵan.
Sonymen qatar, Pavlodarda keshe eki adam keshki ýaqytta Ertis jaǵasynda demalyp júrip sýǵa ketti.
Departamenttiń málimdeýinshe, shamamen saǵat 19:30-da 48 jastaǵy áıel adam sýǵa batyp ketken. Ony qutqarýǵa umtylǵan er adamdardyń biri kóz jumdy.
Aldyn ala derek boıynsha, olar da mas kúıde bolǵan. Batyp ketkenderdi izdeýmen eki júzýge arnalǵan qural arqyly toǵyz qutqarýshy aınalysty. Aıta keteıik, eki jaǵdaı da shomylýǵa arnalmaǵan jaǵalaýda oryn alǵan.
