Ertis óńirinde qara tústi balapandary bar aqqýlar paıda boldy
PAVLODAR. QazAqparat - Aqqýly aýdanynyń ıAmyshevo aýyly mańyndaǵy kólde aqqýlar uıa salǵan. Bul týraly agenttikke kıeli qustardyń sýretterin joldaǵan Aqqýly aýdany ishki saıasat bóliminiń bas mamany Amanjol Erenuly málim etti, dep habarlaıdy pavlodarnews.kz.
«Pavlodar qalasynan aýdanǵan ketip bara jatqan edim. Bir kezde sýdyń jaǵasynda júrgen eki kıeli qus pen úırek-qazdardy kózim shalyp qaldy. Tabıǵattyń ásem kórinisi men qustardy sýretke túsirip alý kópten beri ádetke aınalǵan. Sol ádetim boıynsha kólikten túsip jaqyndap edim, qanattylar sý aıdynynda qara tústi 7-8 kógildirimen birge júzip júr eken. Bizdiń ólkege bul qustar sońǵy jyldary jıi ushyp keletin boldy. Degenmen, balapandarymen birge júrgeni tańdandyrdy», - deıdi Amanjol Erenuly.
Bıologııa ǵylymdarynyń doktory, professor Qaıyrbaı Bazarbekov, qara qýlar Avstralııada mekendeıtinin, bul sol jaqtan kelgen qustar bolýy múmkin ekenin aıtady. «Olardy avstralııalyq qara qýlar dep ataıdy», - deıdi Qaıyrbaı Bazarbekov. Professordyń aıtýynsha, aqqýlar keıde Almaty óńirinde, Kaspıı teńizinde qystaıdy. Ári qaraı Avstralııa, Afrıkaǵa ushyp ketedi. Qazirgi tańda kıeli qustar aımaqtyń kóptegen jerlerinde kezdesedi. Oǵan tynyshtyq faktory, ıaǵnı qaýip-qaterdiń az bolýy áser etedi. «Mysaly, jýyrda áýejaıdyń janynda jáne Aqtoǵaı aýdanynyń mańynda 28 aqqýdy kórip qaldyq», - deıdi Qaıyrbaı Bazarbekov. «Olardyń ishinde úlken jáne qońyr tústileri de kezdesedi. Birinshi jyly aqqýdyń kógildirleri sur tústi bolady, tek úshinshi jyly ǵana aǵarady. Sondyqtan bul balapandardyń da aǵaryp ketpesine kepildik joq. Ádette, aqqýlar jaz mezgilinde keledi de kúzdiń qarasha aıynda ushyp ketedi. Osyǵan deıin oblysta qara qýdy kezdestirgen joqpyn».
Eske sala keteıik, Aqqýly aýdanynyń ortalyǵyndaǵy shaǵyn kólshikterge bıyl mamyr aıynyń ortasynda jup-juppen alty aqqý ushyp kelgen bolatyn.
