Ertis óńirinde «Bıznestiń jol kartasy» sheńberinde 1 896,3 mln teńge bólindi

ASTANA. QazAqparat  - 2018 jyly Ertis óńirinde «Bıznestiń jol kartasy» baǵdarlamasyn júzege asyrýǵa 1 896,3 mln teńge qarastyrylǵan. Onyń ishinde 1 807,3 mln teńge nesıe boıynsha paıyzdyq mólsherlemeni sýbsıdııalaýǵa, 46 mln teńge nesıe boıynsha kepildik usyný jáne 43 mln teńge granttyq qarjylandyrýǵa baǵyttalǵan, dep habarlaıdy pavlodarnews.kz.

Bul týraly óńirlik kommýnıkatsııalar qyzmetinde ótken baspasóz máslıhatynda oblystyq kásipkerlik, saýda jáne týrızm basqarmasy basshysynyń mindetin atqarýshy Danııar Shaımardanov aıtty. -    Jyl basynan beri kásipkerlik máseleler jónindegi óńirlik úılestirý keńesiniń 13 otyrysy ótti, - dedi Danııar Shaımardanov. - Nátıjesinde 263,84 mıllıon teńgege jeti joba maquldanǵan.  «Damý» kásipkerlikti qoldaý qory AQ qarjy agenttigimen 24,1 mıllıon teńgege qarjylandyrylǵan. Sonymen qatar, 2017 jyly jetispeıtin óndiristik ınfraqurylymdy jetkizý boıynsha 239,74 mıllıon teńgege úsh joba maquldanǵan. Atalǵan jobalar jergilikti bıýdjet esebinen bıyl júzege asyrylady».

 Spıkerdiń aıtýynsha, Pavlodar aýdanynyń Jańa qala aýylynda «Jańa qala» ShQ» JShS sý taratqysh, elektr taratý jelilerin qosýǵa, sýlandyrǵysh júıesine keshendi transformatorlyq qosalqy stantsııasyn ornatýǵa  166,9 mln teńge qarastyrylǵan. Óńirlik úılestirý keńesinde jergilikti bıýdjet esebinen uzyndyǵy 1,6 shaqyrym sý qubyry men sorǵy  stantsııasynyń qurylysyna 98 mln teńge, elektrmen qamtamasyz etýge 68,9 mln teńge bólýge kelisim berilgen.