Ertis óńirinde arzandatylǵan dızel otynyn alýǵa 100-den astam fermer elektrondy ótinish bergen
Bul týraly oblystyq aýyl sharýashylyǵy basqarmasynyń basshysy Nurbolat Maqashev aıtty. - Óńirde kúzgi dala jumystaryn júrgizýge 21 myń tonna arzandatylǵan dızel janarmaıy bólindi, - deıdi Nurbolat Maqashev. - Shilde aıyna josparlanǵan janarmaı kólemi boıynsha 4500 tonnaǵa (75%) kelisimshart jasalǵan, 2600 tonnasy (43%) tólengen. Fermerler operator retinde «ABNTRADE» JShS-n tańdady. Operatorlardyń qyzmetimen qosa alǵanda janarmaıdyń 1 tonnasy 186500 teńge turady. (1 lıtri - 158 teńge). Tamyz aıyna bólingen janarmaıdyń 1 tonnasy operatorlardyń qyzmetimen birge 187500 teńgeni quraıdy (1 lıtri - 159 teńge). Búginde 841 mln 225 myń 618 teńgege 4511 tonna arzandatylǵan dızel otynyn alý úshin 105 fermer elektrondy ótinish bergen».
Elektrondy ótinishter berý jáne kvota bólý týraly «Aqparattyq esepteý ortalyǵy» AQ pavlodarlyq bólimshesiniń basshysy Janar Slamova aıtyp berdi. - Shilde aıynan bastap jeńildikpen beriletin dızel otynyn bólý boıynsha oblysta pılottyq joba júzege asyryla bastady, - deıdi Janar Slamova. - Jobanyń maqsaty - fermerler men qyzmet usynýshylardyń arasyndaǵy qandaı da bir baılanystyń aldyn alý. Taýar óndirýshiler qoldau.kz portalynda elektrondy alqaptaryn belgilep, jer ýchaskeleri boıynsha úsh jyldyq 2016-2018 jyl aralyǵyndaǵy buıryqtar men bıylǵy jyldyń josparyn engizedi. Júıe avtomatty túrde qashyqtyqtan jerdi tekseredi. Aýyl sharýashylyǵy basqarmasy sol jerde avtomatty túrde bólinetin dızel otynynyń kólemin esepteıdi. Egin alqaptarynyń kartasy kórsetilgennen keıin bir kúnniń ishinde ótinishterdi qabyldap, kvotany bekitedi. Osylaısha fermer operatormen portal arqyly elektrondy kelisimshart jasaıdy".
Spıkerdiń aıtýynsha, mundaı jańashyldyq arzandatylǵan dızel otynyn ádil bólýdi qamtamasyz etedi jáne qazǵazbastylyqtan aryltady. Sondaı-aq, taýar óndirýshilerge ótinish berý úshin oblys ortalyǵy men aýdanǵa kelýdiń qajeti bolmaıdy. Portal jeti kún 24 saǵat boıy jumys isteıdi.
