Ertis óńirinde 87 myń gektardy ıtalıandyq shegirtkeler basýy múmkin
PAVLODAR. QazAqparat - Bıyl Pavlodar oblysynda ósimdikterge zııandy jándikterdiń sany artady, dep habarlaıdy QazAqparat pavlodarnews.kz silteme.
«Zııankes jándikterdiń ishinde ıtalıandyq shegirtkeler 6-7 jylda bir 10 esege deıin ósip otyrady. 2012 jyly 8-10 myń gektar aýmaqqa jaıylsa, bıyl altynshy jyldyń reti kelip tur. Sondyqtan bıyl 87 myń gektar jerge jaıylady dep kútilýde», - QR AShM Pavlodar oblystyq aýyl sharýashylyǵy ınspektsııasy ósimdikter karantıni jáne fıtosanıtarlyq baqylaý beketteri jónindegi memlekettik ınspektsııa bóliminiń basshysy Azamat Janahmetov.
Zııankestermen kúreske respýblıkalyq bıýdjetten 39 mıllıon teńge qarastyrylǵan.
Azamat Janahmetovtyń aıtýynsha, shegirtkelerdiń eń úlken kólemi Pavlodar aýdanynda - 30 myń ga, Qashyr aýdanynda - 29 myń ga baıqalady. Oǵan qosa, oblystyq bıýdjetten ózge de zııankesterge qarsy jumystar júrgizý maqsatynda 23 myń gektar jerge qarjy bólingen.
Óńirde asa qaýipti zııankesterge qarsy - 2,6 mln ga alqapta, zııandy aǵzalar boıynsha 1,1 myń ga alqapta fıtosanıtarlyq sharalar júrgiziledi.
«Memlekettik zapastaǵy jerler boıynsha jáne barlyq asa qaýipti zııandy aǵzalarǵa qarsy sharalar memleket esebinen ótkiziledi. Al, aýyl sharýashylyǵy ónimderin óndirýshiler óz jerlerinde zııandy aǵzalar boıynsha sharalardy jeke esepterinen júrgizedi. Olardy ár aýdandaǵy belgilengen ınspektorlar zań boıynsha baqylaýǵa alady», - dedi Azamat Janahmetov.
