Ertis óńirinde 1-4 synyp oqýshylaryn mektepterde tegin tamaqtandyrýǵa 1,7 mlrd teńge bólinedi
PAVLODAR. QazAqparat - Kelesi jyly bilim berý salasyna oblys bıýdjetinen 20 mıllıardtan astam qarajat bólinbek, dep habarlaıdy pavlodarnews.kz.
Oblystyq máslıhat sessııasynda depýtattarǵa aqparat jetkizgen óńirlik ekonomıka jáne bıýdjettik josparlaý basqarmasynyń basshysy Maqsat Turlybaev atalǵan kórsetkishtiń 2019 jylmen salystyrǵanda 28%-ǵa artqanyn atady. Atap aıtqanda, oblys mektepterinde 51 myńnan astam 1-4 synyp oqýshylaryn tegin tamaqtandyrýǵa 1,7 mıllıard teńge bólingen. Odan bólek, óńirdiń 111 mektebin Nazarbaev zııatkerlik mektepteri úlgisindegi jıhazben qamtýǵa 108,6 mıllıon teńge qarastyrylady. Sonymen birge, 475 jetim jáne ata-ananyń qamqorynsyz qalǵan balalardy asyraýǵa 1,1 mlrd teńge bólinbek.
«Saryarqa» jáne «Zaton» móltekaýdandarynda mektep qurylystaryna, sondaı-aq, Pavlodardaǵy Abaı atyndaǵy №10 mektep-lıtseıiniń jalǵasyn salýǵa, Aqsý qalasyna qarasty Úshterek aýylyndaǵy balabaqsha ǵımaratyn, Pavlodar aýdanyndaǵy Kemeńger bastaýysh mektebin qaıta jóndeý, Pavlodardaǵy №3 daryndy balalarǵa arnalǵan gımnazııadaǵy sport jáne májilis zalyn salýǵa eki mıllıard teńgeden astam qarajat bólinedi», - dedi Maqsat Turlybaev.
Oblys ákimi Bolat Baqaýov kishigirim mektepterdi ońtaılandyrý isin jalǵastyrýdyń mańyzdylyǵyn atap, onyń bıýdjet qarajatyn únemdep, bilim berý sapasyn arttyrýǵa septigin tıgizetinin aıtty.