Ertis óńiri turǵyndarynyń 70 paıyzy - qalalyqtar
PAVLODAR. QazAqparat - Pavlodar oblysynda 754 myń 501 adam tursa, olardyń basym bóligin qalalyqtar qurap otyr, dep habarlaıdy pavlodarnews.kz.
Bul jóninde óńirlik kómmýnıkatsııalar qyzmetinde ótken jıynda oblystyq statıstıka departamentiniń basshysy Dana Sultanova málim etti. - 2017 jyldyń dál osy kezeńimen salystyratyn bolsaq, aımaqta 1528 adamǵa kóp bolǵan, - dedi departament basshysy. - Qala turǵyndarynyń sany 533 myń 240 adam bolsa, aýyldyq aımaqta 221 myń 261 adamdy qurady. Saraptama qorytyndysy jurtshylyqtyń 70 paıyzy qalada turatynyn kórsetip otyr».
Departament usynǵan aqparatqa súıensek, jalpy qańtar-mamyr aılarynda oblystan 4323 adam kóship ketken. Olardyń 1522-i shet elge ketse, sonyń ishinde 1360-y TMD elderine qonys aýdarǵan. Pavlodarlyqtardyń basym bóligi Reseı men Germanııa memleketterinde ornalasqan. Qazaqstannyń ózge aımaqtaryna 2801 adam qonys aýdardy. Olardyń 45,8 paıyzy Astana qalasyn, 11,3 paıyzy Shyǵys Qazaqstan oblysyn tańdaǵan.
«Osy ýaqyt aralyǵynda oblysqa 2299 adam kóship keldi. TMD elderinen kelgen 153 adamnyń basym bóligi - Reseıden, al 39 adam basqa memleketterden qonys aýdarǵan. Onyń ishinde Germanııa men Qytaı memleketteriniń azamattary bar. Sonymen qatar, elimizdiń basqa oblystarynan Ertis óńirine 2107 adam keldi», - dedi Dana Sultanova.
Qonys aýdarýshylardyń arasynda 38,5 paıyzy orystar bolsa, 25,5 paıyzy qazaqtar. Pavlodar oblysyna kóship kelgenderdiń 71,6 paıyzy orystar men 10,1 paıyzy nemis halqy.
