Ertis óńiri fermerleri azyq-túlik jármeńkesine 110 tonna ónim ákeldi
PAVLODAR. QazAqparat - Pavlodardaǵy aýyl sharýashylyǵy ónimderiniń jármeńkesinen arzan et, sút, irimshik, kókónis, bal, jumyrtqa jáne ózge de azyq-túlik ónimderin satyp alýǵa bolady, dep habarlaıdy QazAqparat pavlodarnews.kz silteme jasap.
«Qazaqstan halqynyń birligi kúnine oraı fermerlerdiń 110 tonna ónimi saýdalanatyn dástúrli aýyl sharýashylyq jármeńkesi uıymdastyryldy», - deıdi oblystyq aýyl sharýashylyǵy basqarmasynyń basshysy Nurlan Sádibekov.- Búgin ońtústik óńirlerden ákelingen qyryqqabatty kelisine 190 teńgege qoıdyq. Túrkistan oblysynda bıyl qyryqqabattyń birinshi legi jınaldy. Osyǵan baılanysty, bul kókónistiń jáne pııazdyń baǵasy bizde túse bastaıdy».
Jármeńkege Pavlodar oblysynyń ákimi Bolat Baqaýov ta kelip qatysty. Ákim et, qyzanaq pen qyryqqabattyń baǵasyn surady. Óńir basshysy Sharlaq jemis tálimbaǵynyń ónimine nazar aýdardy. Ombylyqtar Pavlodardaǵy jármeńkege eki myńnan astam alma, almurt, alsha, órik, qaraqat, tańqýraı, bórijıdek butaqtaryn ala kelgen.
«Tálimbaq Omby oblysynyń Bolshoı Atmas aýylynda ornalasqan. Barlyq kóshet Sibir klımatyna beıimdelgen, 40 gradýs aıazǵa tózedi. Qazaqstan aýdandaryn jıi aralaımyz. Kóshetterimizdi Tereńkól men Jelezın aýdandarynda satyp alady», - deıdi ombylyq tálimbaq satýshysy Tatıana Baranova.
Oblys ákimi Ombydan kelgen kórshiler óz taýaryn tek aýyl sharýashylyq jármeńkelerinde ǵana emes, basqa da ýaqytta saýdalaǵany jaqsy bolar edi degen pikirin bildirdi. Jalpy alǵanda jármeńkege qalanyń birneshe myń turǵyny keldi.
Máselen, Larısa men ıÝlııa Razgovorova Dıspetcher aýdanynda turady jáne jármeńkege árbir senbi saıyn kelip turady. Búgin de Razgovorovalar saýda ornynan eki úlken dorba azyq-túlik alyp ketti.
«Etti 900 teńgeden satyp aldyq, bizdiń aýdanda shoshqa etiniń árbir kelisi 1200-1400 teńge turady, - deıdi ıÝlııa. - Taǵy sút, irimshik, maı, kartop, jańa pisken nan satyp aldyq. Taýar sapasy jaqsy. Jármeńkeniń ornalasýy bizder úshin óte yńǵaıly: barlyǵyn arbaǵa tıep, jaqyn jerde turǵan aıaldamadan 27-inshi avtobýspen úıimizge jetemiz».
Aýyl sharýashylyǵy basqarmasy ókilderi aıtqandaı, 4 mamyr - jumys kúni bolýy sebepti, sol kúni jármeńke ótkizilmeıdi. Kelesi aýyl sharýashylyǵy jármeńkesi 11 mamyrda ótedi.
