«Ertis» klýbynyń dárigeri ushaqtaǵy jolaýshynyń ómirin saqtap qaldy
ASTANA. QazAqparat - Pavlodarlyq «Ertis» fýtbol klýbynyń dárigeri Aleksandr Gaıdýkov ushaqta ózin nashar sezingen jolaýshynyń ómirin saqtap qaldy, dep habarlaıdy pavlodarnews.kz.
«Túrkııada oqý-jattyǵý jıynyn aıaqtaǵan «Ertis» fýtbol klýby Qazaqstanǵa ushý úshin «Stambýl-Almaty» baǵytyndaǵy ushaqqa otyrǵan. Ushý kezinde jolaýshylardyń biri ózin nashar sezinip, klýb dárigeri Aleksandr Gaıdýkov der kezinde kómek kórsetip, er adamnyń ómirin saqtap qaldy. Keıin ol bizdiń dárigerge alǵysyn bildirdi», - dep habarlady «Ertis» FK-nyń baspasóz qyzmeti.
Pavlodardyń týmasy Aleksandr Gaıdýkov elimizdegi tájirıbeli ári tanymal fýtbol dárigeri. 1994 jyldan bastap medıtsına salasynda eńbek etip jatqan Aleksandr Gaıdýkov 2005 jyly fýtbolǵa aýysty. Ol «Ekıbastýzets», «Tobyl» syndy klýbtar men Qazaqstan (U-17) quramasynyń dárigeri bolyp istegen.
