«Ertis» fýtbol klýbyna qandaı oıynshylar jetispeıtindigi aıtyldy
PAVLODAR. QazAqparat – «Ertis» pavlodarlyq fýtbol klýbynyń sporttyq dırektory Edýard Glazýnov klýbtyń transferlik saıasaty týraly málim etti, dep habarlaıdy QazAqparat pavlodarnews.kz saıtyna silteme jasap.
Edýard Glazýnovtyń aıtýynsha, klýb basshylyǵy men jattyqtyrýshylary basqa komandalarda dop teýip júrgen Pavlodar fýtbolynyń túlekterin muqııat baqylaýda. Shabýylshy Arman Smaıylovtyń komandaǵa qaıta oralý múmkindigi týraly aıtqan ol: «Álbette, biz ondaı fýtbolshylardy nazarymyzda ustaımyz. Ókinishke oraı, ondaı oıynshylar Premer-lıgada kóp emes. Tipti, Maksım Fedın men Dmıtrıı Shomkony qarastyrdyq. Alaıda, olar tym qymbat. Smaıylovty alsaq, ol «Aqjaıyqta» bir maýsym oınap, alańǵa jıi shyǵyp óner kórsetti deýge bolmaıdy. Bul jerde sońǵy sheshimdi jattyqtyrýshylar men sarapshy shyǵarady», - dedi Edýard Glazýnov.
Klýbtyń sporttyq dırektory komandadaǵy problemalyq pozıtsııalardy da atap ótti. Onyń aıtýynsha, ótkir shabýylshynyń joqtyǵy máselesi sheshimin tappaı keledi.
«Bıyl bizde myqty shabýylshy bolmaǵany jasyryn emes. Degenmen, Georgıevıch birqatar oıyndarda komandany alǵa súıredi. Máselen, «Tarazǵa» sheshýshi gol soǵyp, dál soqqysymen bizdi 2:0 esebimen jeńip turǵan «Shahterdiń» oısyraı jeńilýine jol ashty. Degenmen, shabýylshy máselesi sheshilmedi», - dedi ol.
Odan basqa komandaǵa myqty qaqpashy, ortalyq qorǵaýshylar men jartylaı qorǵaýshylar qajet. Mundaǵy basymdyq birneshe pozıtsııada erkin oınaı alatyn ámbebap fýtbolshylarǵa beriledi.
Edýard Glazýnov aıtqandaı, komandanyń serbııalyq bas bapkeri Mılan Mılanovıchke bir elden úsh legıonerden artyq oıynshy almaý usynyldy.
«Bıyl Mılanovıch Georgıevıch, Stanoevıch pen Stamenkovıchti aldyrtty. Ýrosh Vıtasty qosqanda bizde tórt serb legıoneri boldy. Alaıda olar jerlesin qoldap, bas bapkerdi jerge qaratpaýǵa tyrysty. Degenmen, bizder bas bapkerdiń pikirine áser ete alamyz. Ózara áńgime barysynda bir elden 2-3 oıynshydan artyq alýǵa bolmaıdy degen sheshimge keldik», - dedi klýbtyń sporttyq dırektory.
Aıta keteıik, Ertis keler maýsymǵa ázirlikti 8 qańtarda bastaıdy. Búginde komanda alty oıynshysymen kelisimshartty uzartty.
