«Ertis» fýtbol klýby jelide taraǵan qaýesetke jaýap berdi
NUR-SULTAN. QazAqparat - Pavlodardyń «Ertis» fýtbol klýby áleýmettik jelide jarııalanǵan qaýesetke qatysty jaýap berdi. Onda fýtbol klýby sotta jeńilip, endi eki mıllıon eýro tóleýge mindettelgeni kórsetilgen, dep habarlaıdy QazAqparat tilshisi «Ertis» fýtbol klýbynyń saıtyna silteme jasap.
«Áleýmettik jelide atalmysh málimet 22 jeltoqsanda jarııalandy. Onda fýtbol klýbynyń sotta jeńilip, eki mıllıon eýro tóleýge mindettelgeni jáne klýbtyń esep-shotyn júrgizýge tyıym salynǵany aıtylǵan. Ol qaýesetti joqqa shyǵaramyz. «Ertis» klýbynyń eshkimniń aldyna bereshegi joq. Klýbtyń esep-shotyna eshqandaı tyıym salynǵan joq. Jýrnalısterden aqparattyń naqty bolýy úshin derekti tekserip alýdy suraımyz. Jankúıerlerden resmı derek kózine senim bildirýdi ótinemiz», - dep jazylǵan klýbtyń resmı aqparatynda.
