«Ertis» fýtbol klýby quramyn jańartýda
PAVLODAR. QazAqparat - Pavlodardyń «Ertis» fýtbol klýby kezekti jańa fýtbolshylarmen tolyqty, dep habarlaıdy QazAqparat pavlodarnews.kz saıtyna silteme jasap.
«Ertis» FK-nyń medıa-ofıtseri Darhan Bekishevtiń aıtýynsha, komandaǵa «Ekibastuz» qaqpashysy Ilıa Sotnık aýysty.
«20 jastaǵy Ilıa Sotnık Ekibastuz fýtbol mektebiniń túlegi. 2015 jyldan 2018 jylǵa deıin «Ekibastuz» FK-da oınaǵan. U-21 Qazaqstan jastar quramasyna turaqty túrde shaqyrtylady», - deıdi Darhan Bekishev.
Sonymen qatar, ótken jyldyń sońǵy kúnderinde pavlodarlyqtar quramy «Qyzyljar» shabýylshysy Tımýr Moldınovpen tolyqty.
Kópshiliktiń pikirinshe, 2018 jylǵy fýtbol maýsymynyń jańa esimderiniń biri Tımýr Moldınov byltyr 29 match ótkizip, segiz dop soqqan.
Klýbtyń resmı saıtynda ornalastyrylǵan aqparatqa súıensek, 2015 jyldan beri Pavlodarda óner kórsetip kele jatqan komandanyń kóshbasshysy portýgalııalyq legıoner Karlos Fonseka 2019 jyly da «Ertiste» oınaıdy.
Jergilikti fýtbol mektebiniń túlekterine kelsek, shabýylshy Arman Smaıylov, jartylaı qorǵaýshylar Artem Popov pen Arman Keńesov pavlodarlyqtar sapynda óner kórsetýlerin jalǵastyrady. Jańa kelisimsharttardyń merzimi 2019 jyldyń sońyna deıin josparlanǵan.
