«Ertis» fýtbol klýby bas bapkersiz qaldy
PAVLODAR. QazAqparat - Pavlodarlyq «Ertis» fýtbol klýbynyń bas bapkeri Vıacheslav Groznyı qyzmetinen ketti, dep habarlaıdy pavlodarnews.kz .
Klýbtyń baspasóz qyzmeti usynǵan aqparatqa súıensek, Vıacheslav Groznyı kelisimshartynyń aıaqtalýyna baılanysty komandadan ketti. 9 qarasha kúni ýkraındyq maman Pavlodar oblysynyń ákimimen júzdesken. Kezdesý barysynda aımaq basshysy bapkerge atqarǵan nátıjeli jumysy men «Ertistiń» Eýrokýbok dodasyna joldama alǵany úshin alǵysyn bildirgen bolatyn. Alaıda, sol kezde kelisimshartty uzartý máselesi ashyq kúıde qaldy. Ókinishke oraı, klýb basshylyǵy jattyqtyrýshymen jańa eńbek kelisimshartyn jasaǵan joq.
Eske sala ketsek, Qazaqstan chempıonatynyń sońǵy týrynda «Ertis» óz alańynda qaraǵandylyq «Shahterdi» qabyldap, sońǵy mınýtta gol salyp jeńiske jetti. Maýsym qorytyndysy boıynsha pavlodarlyq komanda tórtinshi oryn ıelenip, keler jyly Eýropa Lıgasynyń irikteý kezeńinde oınaýǵa joldama utyp alǵan bolatyn.
