Ertis FK quramy Grýzııa chempıonatynyń úzdik surmergenimen tolyqty
PAVLODAR. QazAqparat - Túrkııada birinshi oqý-jattyǵý jıynyn ótkizip jatqan pavlodarlyq fýtbol klýby eki jańa fýtbolshymen tolyqty, dep habarlaıdy pavlodarnews.kz.
Ertis FK baspasóz qyzmeti málim etkendeı, búginde komandaǵa eki sheteldik fýtbolshy - belarýs qaqpashysy Sergeı Chernık pen grýzın shabýylshysy Levan Kýtalııa aýysty.
30 jasar forvard óz eliniń komandalarynda jáne sheteldik klýbtarda dop tepken. Máselen, 2008-2011 jyldary ol Bosnııa jáne Gertsegovınanyń «Slavııa» jáne «Zrınskı Mostar» komandalarynda óner kórsetti. Ótken maýsymdy shabýylshy Tbılısıdiń «Dınamosynda» ótkizip, 33 matchta 20 gol soqqan. Sonymen birge, ol «Dınamonyń» sapynda 2019 jylǵy Grýzııa chempıony atandy. Fýtbolshy mansabynda barlyǵy 211 matchta oınap, 51 gol soqqan.
Belarýs qaqpashysyna kelsek, Sergeı Chernık pavlodarlyq klýbqa «BATE» sapynan aýysyp keldi. Borısovtik klýbta ol barlyǵy 109 match, onyń ishinde Chempıondar lıgasynda 23 match ótkizgen. Sonymen birge, qaqpashy 2017-2019 jyldary Frantsııanyń «Nansı» komandasynda oınady. Lıga 1 chempıonatynda ol 17 kezdesýge qatysqan.
Túrkııada alǵashqy oqý-jattyǵý jıynyn ótkizip jatqan komanda bas bapkeri Mılan Mılanovıch atap ótkendeı, munda fýtbolshylardyń fýnktsıonaldyq daıarlyǵyna erekshe mán beriledi. - Birinshi jıynda bazalyq daıyndyqqa mán beriledi, - deıdi Mılan Mılanovıch. - Alaıda barlyq jattyǵýlarda doppen jumys isteımiz. Bul oıynshylarǵa da qyzyqty, ári olardyń ózara jaqyndasýyna jaǵdaı jasaıdy. Jańa oıynshylar kóp bolady. Ázirshe, fýtbolshylar, onyń ishinde jastar komandada qalý úshin qalýǵa tyrysatynyn kórsetýde. Komandanyń bas bapkeri aıtqandaı, jıyn barysynda eki joldastyq kezdesý uıymdastyrý josparlanyp otyr. Olar 18 jáne 24 qańtarda ótedi.