«Ertis cinema» halyqaralyq kınofestıvaliniń úzdikteri anyqtaldy
ASTANA. QazAqparat - 11-14 shilde aralyǵynda Pavlodarda І Halyqaralyq «Ertis cinema» qysqametrajdy kıno jáne derekti fılmder kınofestıvali ótti, dep habarlaıdy QazAqparat tilshisi kınostýdııanyń baspasóz qyzmetine silteme jasap.
Jalpy kınofestıval barysynda 20 elden 100-ge jýyq fılmder kórsetilgen.
«Ertis cinema» kınofestıvaliniń bas júldesi (derekti fılmder arasynda) qazaqstandyq rejısser Evgenıı Lýmpovtyń «Jol» fılmine buıyrsa, qysqametrajdy fılmder arasynda reseılik rejısser Alekseı Sokolovtyń «Jóke shaıy» fılmi úzdik dep tanyldy.
Al Sh.Aımanov atyndaǵy «Qazaqfılm AQ túsirgen «Óıtkeni jaqsy kóremin» atty derekti fılm kórermender kózaıymy júldesimen marapattaldy.
Týyndy QR Mádenıet jáne sport mınıstrligi tapsyrysy boıynsha túsirilgen. Atalǵan derekti fılm Qazaqstanda ultaralyq nekede tatý-tátti, bereke men birlikte, beıbitshilik pen yntymaqta ómir súrip jatqan otbasylar týraly baıandaıdy.
«Pavlodarlyqtarǵa jáne qala qonaqtaryna osy júlde úshin alǵysymyzdy bildiremiz. Bizge senip, osy fılmdi túsirýge qoldaý bildirgen «Qazaqfılm» kınostýdııasynyń «Derekti kıno jáne kınoshejireler» shyǵarmashylyq birlesitiginiń jetekshisi Áset Ernazarovqa, sondaı-aq bizge baǵyt-baǵdar bergen ustazymyz Ásııa Baıǵojınaǵa alǵysymyz sheksiz,- dedi fılmniń stsenarıı avtory Nadıra Sadýova.
Aıta keterligi, І Halyqaralyq «Ertis cinema» qysqametrajdy kıno jáne derekti fılmder kınofestıvali «Pavlodar oblysy mádenıet, muraǵat jáne qujattama basqarmasy» memlekettik mekemesiniń qoldaýymen ótkizilip otyr. Festıvaldi rejısser Lıýdmıla Lebedeva, jýrnalıst Salaýat Igilikov, pavlodarlyq jýrnalıst jáne kınotanýshy Lıýdmıla Baıýsheva uıymdastyrǵan.
