«Ertis» burynǵy oıynshylar aldyndaǵy qaryzyn óteýge jaqyn

PAVLODAR. KAZINFORM — Qazir bir ǵana sheteldik legıonerdiń qaryzy jabylmaǵan. Klýb basshylyǵy ózge boryshtardyń barlyǵyn jolyn taýyp, rettegen.

Pavlodarlyq «Ertis» fýtbol komandasy keler jyly Birinshi lıgada oınaıdy. Fýtbol chempıonatyndaǵy jolyn qaıtadan «nólden» bastaýǵa májbúr bolǵan ol bıyl Ekinshi lıgada jeńimpaz atandy. 

Klýb dırektory Seıitbek Sembaevtyń aıtýynsha, komandanyń top-menedjmenti jyl boıy eski qaryzdardy jabýmen shuǵyldanǵan.

— «Ertis»-tiń burynǵy fýtbolshylary men bapkerleri aldyńda biraz borysh jınalyp qalǵany málim. Mundaı qaryzdardyń sany — 37. Biz oblys basshylyǵynyń qoldaýymen barlyq máseleni rettedik. Sonyń ishinde bolgarııalyq bapker Dımıtar Dımıtrovpen de tolyq esep aıyrystyq. Ol ózge fýtbolshylar sekildi qaryz somasyn jeńildetýge kelisti. Klýbty saqtap qalý mańyzdy ekenin barlyǵy túsindi. Qazir bir ǵana fýtbolshynyń, atap aıtqanda túrkimendik legıoner Rýslan Mıngazovtyń boryshy jabylǵan joq. Fýtbolshy qaryz somasyn shegerýden bas tartty. Onyń máselesi keler jyldyń basynda sheshiledi, — dep atap ótti Seıitbek Sembaev. 

Qazir Pavlodarda komanda quramyna jańadan oıynshylardy irikteýge jumys jasalyp jatyr. Klýbta oınap júrgender jáne oblys ortalyǵyndaǵy fýtbol mektepteriniń shákirtteri jattyǵý jıyndarynda óner kórsetip, kózge túskenderimen jańadan sharttar jasalýy múmkin. Jańa bapkerlik shtab áleýetti oıynshylardy tańdaıdy. Al jańa jyl merekesinen keıin komanda Shymkent jáne Tashkent qalalarynda oqý-jattyǵý jıyndaryn ótkizýdi kózdep otyr.

Keler jyly «Ertis»-tiń qurylǵanyna 60 jyl tolady.

Eske sala keteıik, «Ertis» komandasynyń bas bapkeri qyzmetinen ketti.