«Ertis» - «Aqtóbe» oıynynda pavlodarlyq qaqpashy jaraqat alyp, qorǵaýshy qaqpaǵa turdy
ASTANA. QazAqparat - Premer-Lıganyń 31-týrynda pavlodarlyq «Ertis» Ortalyq stadıonda «Aqtóbe» komandasyn qabyldady. 1:1 esebimen aıaqtalǵan match tarıhı sátterge toly boldy.
Alma-kezek shabýyldarmen bastalǵan oıynnyń aǵashqy bóliginde esep ashylmady, dep habarlaıdy pavlodarnews.kz .
Al, ekinshi taımnyń 72-mınýtynda pavlodarlyq qaqpashy Davıd Lorııa dopqa sekirgende sátsiz qulap, aıaǵyn qaıyryp aldy. Ókinishke oraı, Davıd kezdesýdi jalǵastyra almady. Kapıtandy aýystyratyn múmkindik bolmady, sebebi, «Ertis» ruqsat etilgen úsh fýtbolshy aýysymyn osy ýaqytqa deıin paıdalanyp qoıǵan edi. Sondyqtan, qorǵaýshy Rýslan Esimov Lorııanyń jeıdesi men qolǵabyn kıip, qaqpaǵa turdy. Fýtbolda qaqpashynyń ornyna qorǵaýshynyń qolǵap kıip, qaqpany qorǵaýy óte sırek qubylys ekenin aıta keteıik. Alań ıeleri 10 oıynshysymen qalǵanda, qonaqtar shabýylyn údete tústi. Biraq, kásibı qaqpashy bolmasa da Rýslan birneshe ret komandasyn múmkin bolǵan goldan qutqaryp jatty, tipti, qarsylastardyń soqqylaryna toıtarys berdi. Negizgi ýaqyt aıaqtalǵan soń, bas tóreshi qosymsha 8 mınýt ýaqyt qosty. Ádette, qosymsha ýaqyt orta eseppen úsh mınýttan artyq bolmaıtyn edi. 92-mınýtta aqtóbelik Tomash Shımkovıch gol soǵyp komandasyn alǵa shyǵardy. Alaıda, kezdesýdiń eń sońǵy 97-mınýtynda Karlos Fonseka áýeden kelgen dopqa bıik sekirip, tarazy basyna teńdik ornatty. Qorytyndy esep - 1:1. - Búgin óte aýyr match boldy. Biz jeńiske jetýge tyrysyp edik, qoldan kelmedi. Men bala kezden qaqpashy bolyp oınaıtynmyn, biraq, qazir qorǵaýshymyn. Davıd jaraqat alǵan soń jaýapkershilikti alyp, jeıdesin kıdim. Jeńiske jete almaǵanymyz ókinishti árıne. Qoldaý bergen barsha jankúıerlerge alǵysym sheksiz, - dedi match qaharmany Rýslan Esimov.
