Erteńnen bastap magıstratýra men doktorantýraǵa túsýge qujat qabyldanady

25 qazanda magıstratýraǵa túsýge arnalǵan keshendi testileýge jáne doktorantýraǵa túsý emtıhanyna qujat qabyldaý bastalady, dep habarlaıdy Kazinform. 

Tirkelý Ulttyq testileý ortalyǵynyń app.testcenter.kz saıtynda ótedi. KT-ǵa tirkelý 2023 jylǵy 10 qarashaǵa deıin jalǵasady.

Testileýdiń ózi qarasha-jeltoqsan aılarynda ótedi.

Ótinish berý kezinde túsýshi testileýdi tapsyrý qalasyn óz erkimen tańdaıdy.

Úmitkerler ótinishti qabyldaý merzimi aıaqtalǵanǵa deıin (10 qarashaǵa deıin) bilim berý baǵdarlamalarynyń toby, tili jáne testileýdi tapsyrý qalasyn boıynsha ótinishke ózgerister engize alady.

Testileýdi ótkizý kúni týraly aqparat oqýǵa túsýshiniń jeke kabınetinde 15 qarashada qoljetimdi bolady.

Keshendi testileý formatynda ózgerister joq, ol elektrondyq formatta ótkizilip, úsh bloktan turady: shet tili boıynsha test, oqýǵa daıyndyǵyn anyqtaýǵa arnalǵan test jáne bilim baǵdarlamalary tobynyń beıini boıynsha test.

Bıyl ǵylymı-pedagogıkalyq magıstratýraǵa túsý úshin shekti ball – 75 baldy, beıindik magıstratýraǵa túsý úshin 50 baldy quraıdy.

Keshendi testileý nátıjesimen kelispegen jaǵdaıda oqýǵa túsýshiler testileý aıaqtalǵannan keıin onlaın-apellıatsııaǵa bere alady.

Doktorantýraǵa túsý emtıhanyna tirkelý 2023 jylǵy 10 qarashaǵa deıin jalǵasady. Túsý emtıhany qarasha-jeltoqsan aılarynda ótedi.

Esterińizge sala keteıik, doktorantýraǵa túsý úshin tek bir joǵary oqý ornyn jáne bilim baǵdarlamalarynyń bir tobyn tańdaýǵa bolady.

Eger oqýǵa túsýshige berilgen ótinishke (testileýdi tapsyrý qalasy, bilim berý baǵdarlamalarynyń toby, testileýdi tapsyrý tili) ózgerister engizý qajet bolǵan jaǵdaıda, oǵan ótinishterdi qabyldaý bazasy jabylǵanǵa deıin (10 qarashaǵa deıin) ótinishti óńdeýge nemese óshirýge múmkindik beriledi.

Túsý emtıhanyn ótkizý orny men ýaqyty týraly aqparat oqýǵa túsýshiniń jeke kabınetinde 23 qarashada qoljetimdi bolady.

Doktorantýraǵa túsý emtıhanyna esse jazý, doktorantýraǵa daıyndyq testi jáne bilim berý baǵdarlamasy tobynyń beıini boıynsha emtıhan kiredi.

Jalpy, túsý emtıhanynyń eń joǵary baly – 100 ball, onyń ishinde áńgimelesý – 20 ball, esse – 10 ball, doktorantýrada oqýǵa daıyndyǵyn anyqtaýǵa arnalǵan test – 30 ball, beıini boıynsha emtıhan suraqtary - 40 ball. 

Al memlekettik bilim berý tapsyrysy boıynsha konkýrsqa qatysý úshin jáne aqyly negizde doktorantýraǵa túsý úshin shekti ball – 75.

Sondaı-aq bolashaq doktoranttardyń memlekettik jáne shet tilderin meńgergendigin rastaıtyn sertıfıkattary bolýy qajet.

Atap óteıik, jazǵy testileýge kirgizý kezinde erejelerdi buzǵan, sondaı-aq nátıjeleri joıylǵan test tapsyrýshylar osy emtıhandarǵa qaıta qatysa almaıdy.

Magıstratýraǵa túsýshilerge 3,8 myń, al bolashaq doktoranttarǵa 700-den astam memlekettik bilim granty bólindi.