Erteńnen bastap «Halyq markasy» jalpyulttyq baıqaýyna daýys berý bastalady
Bul týraly búgin Ortalyq kommýnıkatsııalar qyzmetindegi baspasóz máslıhatynda atalǵan jobanyń jetekshisi Rımma Tájibaeva málim etti.
Onyń sózine qaraǵanda jeńimpazdardy anyqtaý úshin tutynýshylar halykmarkasy.kz saıtyna kirip, óziniń súıikti ónimine daýys bere alady. Onlaın túrde daýys berý 9 qyrkúıekten 8 qazanǵa deıin jalǵasady.
Jobanyń maqsaty - otandyq taýar óndirýshilerdiń taýar markalarynyń tanymaldylyǵyn arttyrý, naqty taýarlarǵa baǵa berý arqyly jalpy taýar markalarynyń qanshalyqty suranysqa ıe ekenin anyqtaý.
Baıqaý jeńimpazdary «Halyq markasy» belgisin óz taýar oramasyna jarnama retinde eki jylǵa deıin qoldanýǵa múmkindik alady. Uıymdastyrýshylardyń paıymynsha, atalǵan belgi arqyly ónim shyǵarýshylar tutynýshylar arasynda tanymaldylyqqa ıe bolady.
Belgili bolǵandaı, qazirgi kezde 70-ten astam otandyq óndirýshi, 100-den astam marka baıqaýǵa qatysýǵa ótinish berdi. Jeńimpazdar birqatar atalym boıynsha anyqtalady. Olardyń ishinde «Gazdalǵan sýsyn», «Sháı», «Kondıterlik taǵamdar», «Un», «Sút ónimderi» syndy bólimder bar.
Jeńimpazdardy marapattaý sharasy Mılandaǵy «EKSPO-2015» kórmesiniń Qazaqstan pavılonynda 19 qazanda - Dúnıejúzilik azyq-túlik aptalyǵy aıasynda ótedi dep kútilýde.
