Erteńgi mamannyń qalyptasýyna bilikti pedagogterdiń tálimi aýadaı qajet - Dúısenova
ALMATY. KAZINFORM — Almaty qalasyna jumys sapary barysynda QR Premer-Mınıstriniń orynbasary Tamara Dúısenova Qazaq ulttyq qyzdar pedagogıkalyq ýnıversıtetiniń qyzmetimen tanysty.
Búginde ustazdar ustahanasy sanalatyn oqý ornynda 5 ınstıtýt, 24 kafedra aıasynda 9 myńdaı stýdent bilim alady.
Pedagogıkalyq bilim berýdi kúsheıtý maqsatynda Dúnıejúzilik banktiń qoldaýymen erte jastaǵy jáne erekshe qajettiligi bar balalarmen jumys isteýge úıretýge múmkindik beretin dıdaktıkalyq, ádistemelik jabdyqtary bar ınklıýzııa kabınetteri ázirlendi.
Aıta keteıik, «Erte jastaǵy balalardy damytý jáne otbasyn zertteý ortalyǵy» elimizde alǵash ret ashylyp otyr. Sondaı-aq mamandar mektepke deıingi uıymdardyń pedagogterine ádistemelik kómek kórsetýde.
Vıtse-premer bul bastamaǵa oń baǵa berip, balalarmen jumys isteıtin bolashaq mamandarǵa bul taptyrmas múmkindik ekenin atap ótti.
Ýnıversıtetke tıesili 3 oqý korpýsy 5 myń orynǵa shaqtalǵan. Sondyqtan ınfraqurylymdy keńeıtý máselesi ózekti bolyp otyr.
Bıyl oqý orny aýdany 12 myń sharshy metrden asatyn jańa ǵımaratty ıemdenip otyr, onda gýmanıtarlyq jáne jaratylystaný ǵylymdary, fızıka, matematıka jáne tsıfrlyq tehnologııalar ınstıtýttary jumys isteıtin bolady.
Tamara Dúısenova ýnıversıtettiń professorlyq-oqytýshylyq quramymen kezdesip, onda salanyń ózekti máseleleri talqylandy. Bilim berý júıesin odan ári damytý mindetterin iske asyrýdaǵy muǵalimderdiń róline erekshe nazar aýdaryldy.
«Bizde jyl saıyn 400 myń bala dúnıege keledi. Esepke súıensek, 2030 jyldan keıin eńbek naryǵynda 2003 jyldan beri dúnıege kelgenderdiń úlesi basym bolady. Sondyqtan erteńgi kúni elimizdiń damýyna jumys isteıtin azamattardyń qalyptasýyna bilikti pedagogterdiń tálimi aýadaı qajet. Bul — egemendiktiń saqtalýyna kepil bolatyn faktor», — dep atap ótti Tamara Dúısenova.
Bıyl Qyzdar pedagogıkalyq ýnıversıtetiniń qurylǵanyna 80 jyl tolmaq.
Ustazdar ustahanasy atanǵan irgeli oqý ornynyń bul belesin el kóleminde atap ótý josparlanǵan. Tamara Dúısenova osy bastamany qoldaıtynyn jetkizdi.
Bul rette uıymdastyrylatyn sharalar pedagogıka salasynyń osy jyldar arasynda qandaı ózgeristerge tap bolǵany, búginginiń ustazy qandaı bolýy kerek ekenine mán beretin tanymdyq sıpatta ótýi kerektigine toqtaldy.
